Җу хәйлун диний тәблиғниң даирисини бәлгилигән

Мухбиримиз җүмә
2017-04-01
Share


31-Март уйғур аптоном районниң муавин партком секретари җу хәйлун қәшқәрдә аталмиш вәтәнпәрвәр диний затларни йиғип, уларға диний тәблиғниң даирисини көрситип бәргән. Униң бу қетимқи қәшқәрдики диний затлар билән болған учришиши “уйғур аптоном районниң әсәбийликни түгитиш низами” елан қилинип ғулғула қозғиған мәзгилгә тоғра кәлди.

Тәңритағ ториниң хәвәр қилишичә, җу хәйлун диний затлардин “хитай компартийәсини һимайә қилиш, сотсиялистик тузумни һимайә қилиш, хитай һөкүмитиниң сиясәтлирини тәшвиқ қилиш, диний тәблиғләрдә вәтәнпәрвәрлик идийисини чүшәндүридиған, урғутидиған мәзмунларға чоңқурлап кириш, тинчлиқ, оттура йол, кәң қорсақлиқни тәрғиб қилиш, диний аммини аңлиқ һалда әсәбийлик, миллий бөлгүнчилик вә террорлуққа қарши турушқа йетәкләш” ни тәләп қилған.

У йәнә диний затларни динни сотсиялизмға маслаштурушта актип рол ойнашқа чақирған.

У, йиғинда һәр дәриҗилик партийә һөкүмәтләрдин “уйғур аптоном районниң әсәбийликни түгитиш низами” ни әстайидил әмәлийләштүрүп диний хизмәтни “хитайлаштуруш” йөлинишигә йетәкләш ишлирини күчәйтишни, вәтәнпәрвәр диний затлардин туғқан вә достларни тутушни тәләп қилған.

29-Март уйғур аптоном районлуқ хәлқ қурултийи 50 маддилиқ “аптоном районниң әсәбийликни түгитиш низами” мақуллиған.

Мәзкур низамда сақал қоюш өлчәмлири вә диний йосунда кийинишкә қаритилған чәклимиләр көрситилгәндин башқа “радио, телевизийә қатарлиқларни чәткә қеқиш, йемәкликләрниң һалаллиқ уқумини кеңәйтиш, пәрзәнтлириниң дөләт маарипи тәрбийәси елишиға йол қоймаслиқ” қатарлиқларму “әсәбийлик” категорийәсигә киргүзүлгән.

Даириләр мәзкур низамниң җәмийәт муқимлиқини бәрпа қилишта муһим рол ойнайдиғанлиқини билдүргән болсиму, әмма кишилик һоқуқ органлири буниң уйғурларниң диний әркинликини техиму қаттиқ боғидиғанлиқини көрсәткән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт