Teklimakan chöllükide amérikaning ilghar tipliq urush ayropilanlirining modélliri bayqalghan

Uyghur élining teklimakan chöllükide amérikaning F-22 we F-35 eng ilghar téxnikaliq urush ayropilanlirining modélliri bayqalghan. “Yaponiye xewerliri” ning bildürüshiche, amérikaning eng ilghar téxnikaliq urush ayropilanliri modéllirining teklimakan chöllükide bayqilishi, xitay hawa armiyesining bu urush ayropilani modéllirigha qarita hujum nishani meshqi élip barghanliqini körsitidiken. Bu xitay azadliq armiyesining amérika herbiy eslihelirining modélini yasap, uninggha qarita tunji qétim hujum nishani meshqi élip bérishi emes. Buningdin ilgiri uning teklimakan chöllükide amérika awiyamatkilirining modélini yasap, uninggha qarita hujum meshqi élip barghanliqi ashkarilan'ghan idi. Bu xitay azadliq armiyesining amérika bilen yüz bérish éhtimali bolghan tasadipiy bir urushqa qattiq teyyarliq qiliwatqanliqini körsitidu, dep qaralmaqta.

 “Yaponiye xewerliri” ning bildürüshiche, teklimakan chöllükide élip bérilghan qarigha étish meshqi, 5-ayning axirlirida tartilghan sün'iy hemrah süretliridin melum bolghan. Bu heptining bashlirida élan qilin'ghan bu heqtiki xewerlerde, saxta urush ayropilan modélliri we uchush yollirining sün'iy hemrah süretliri élan qilin'ghanliqi, bu süretlerdin uchush yollirining bombardiman qilin'ghanliqi we nurghun urush ayropilani modéllirining weyran qilin'ghanliqi körülgenlikini bildürgen. “Yaponiye xewerliri” ning qeyt qilishiche, nöwette amérikaning F-35 tipliq urush ayropilani yaponiye yamaguchi wilayitining iwakuni dégen jayida turushluq amérika déngiz armiyesi quruqluqta urush qilish qisimlirining bazisigha orunlashturulghan bolup, teklimakan chöllükidiki hujum meshqi yaponiyediki mezkur bazini teqlid qilghan bolushi mumkin, dégen gumanlar bar iken.

Xongkongdiki “Yultuzluq aral” gézitining 1-iyul bergen xewiride, teklimakandiki mezkur herbiy meshqining sün'iy hemrah süretliri bulghariye herbiy torida élan qilin'ghanliqini bildürgen idi.