Уйғур диярида телефон вә тор арқилиқ алдамчилиқ қилишқа зәрбә берилди

Мухбиримиз үмидвар
2016-12-05
Елхәт
Пикир
Share
Принт

Уйғур аптоном районида телефон вә тор арқилиқ пуқраларниң пулини алдап еливелиш җинайәтлири еғирлашқанлиқи үчүн бу йил 8-айда қурулған уйғур аптоном районлуқ телефон-тор алдамчилиқиға қарши туруш мәркизи җидди һәрикәткә өтүп, қисқиғина үч айға йәтмигән вақит ичидә 1070тин дин артуқ һесабат номури вә делоға четишлиқ 19 милйон йүәнни төләштин тохтитип тоңлатқан.

Тәңри тағ ториниң бу һәқтики хәвиридә көрситилишичә, пуқраларниң пуллирини алдиғучиларниң бәзилири өзлирини хәлқ сақчиси дәп ативалған болуп, һәтта 11-айниң 3-күни өзини хәлқ сақчиси дәп атиған бир алдамчи фукаң шәһиридики бир кишиниң оғлиниң оқуш пули үчүн һазирлиған 10 миң йүән пулини алдап еливелишқа урунғанда сезилип, сақчи оргиниға мәлум қилинғандин кейин, алдамчиниң банка һесаби тоңлитилиш арқилиқ алдап елинған бу пул қайтуривелинған.

Уйғур диярида ямриған бу хил телефон,тор васитилири арқилиқ кишиләрниң банка һесабат номуридин алдап пул еливелиш вәқәлири хитай һөкүмәт тәрәпниң диққитини тартқанлиқи үчүн уйғур аптоном районлуқ җамаәт хәвпсизлик назарити бу йил 29-авғуст күни рәсими түрдә телефон-тор арқилиқ алдамчилиқ қилишқа қарши туруш мәркизи қуруп, пүтүн уйғур дияри бойичә өз паалийәтлирини башлиған иди.

«Хитай телеграф тори»ниң хәвәр қилишичә, пүтүн хитай бойичә телефон вә тор алақиси арқилиқ алдамчилиқ қилиш 2009-йилидин буян изчил юқири котүриливатқан болуп, хитай хәлқ қурултийи 2013-йили, хитай бойичә бу хилдики алдамчилиқтин 300 миң қетим йүз берип, хәлқниң 10 милярд юән пули зиянға учриғанлиқини билдүргән.

«Хәлқ тори»ниң хәвәр қилишичә, бу хил алдамчилиқ нөвәттә әң юқири пәллигә йәткән болуп, 2015-йили 11-айдин бу йил 9-айғичә пүтүн хитайда 13 мин адәм бу хил алдамчилиқ җинайити билән тутулған икән.

Пикирләр (0)
Share
Толуқ бәт