Xitay Uyghur rayonida "Térrorluq weqeliri"ge qarshi alahide teptish guruppisi qurghan

Muxbirimiz erkin
2016-12-30
Élxet
Pikir
Share
Print

28‏-Dékabir xitayning qaraqash nahiyelik partkomi hujumgha uchrighandin kéyin, xitay da'iriliri Uyghur rayonida teptish emeldarliridin "Térrorluq" qa qarshi 30 kishilik bir guruppa qurup chiqqan.

Shinxu'a agéntliqining xewer qilishiche, bu alahide teptish guruppisi Uyghur aptonom rayonining herqaysi wilayet‏, oblastliridin teshkil qilin'ghan. Ular ürümchi, qeshqer, xoten, aqsu, korla, ghulja qatarliq Uyghurlar zich olturushluq "Nuqtiliq rayonlar"da wezipe ijra qilidiken.

Mezkur qarar 29‏-dékabir yéngi qobul qilin'ghan tunji türkümdiki 2119 neper teptish emeldari Uyghur aptonom rayonidiki 120 teptish orginida birla waqitta qesem bérip wezipe tapshuruwalghan küni élan qilin'ghan. Uyghur aptonom rayonluq yuqiri teptish da'irilirining bildürüshiche, 2119 teptish emeldarining 1180 nepiri xitay, 939 nepiri Uyghur, qazaq, qirghiz we bashqa milletlerdin teshkil qilghan.

Xitay da'irilirining qaraqash weqesining arqidinla alahide teptish guruppisi teshkillep, Uyghurlar zich olturushluq rayonlargha orunlashturushi Uyghur teshkilatlirining diqqitini qozghidi. D u q bayanatchisi dilshat rishit, bu xitayning qanliq toqunushlardin héchqandaq sawaq almighanliqi we basturushni dawamliq kücheytidighanliqining ipadisi, dédi.

Uning qeyt qilishiche, amanliq küchlirini, teptish we bashqa qanun organlirini ishqa sélip, Uyghurlarni qattiq basturush hazirgha qeder héchqandaq mesile hel qilmighan. U, bu tedbirler qarshiliqni téximu ulghaytishtin bashqa ishqa yarimaydu, dédi.

Toluq bet