Xitay asasliqi musulman döletlerdin kelgen axbaratchilarni yighip Uyghur élini ziyaret qildurghan

Muxbirimiz jüme
2017-05-21
Élxet
Pikir
Share
Print


Uyghur élide gherb muxbirlirining erkin xewer bérishi qattiq cheklimilerge uchrawatqanliqi sürülüwatqan mezgilde xitay da'iriliri asasliqi musulman döletlerdin kelgen axbaratchilarni yighip Uyghur rayonining bir qisim jaylirini ziyaret qildurghan.

Sin'gapordin chiqidighan yéngi boghuz gézitining xewer qilishiche, xitay da'irilirining buningdiki meqsiti Uyghur rayonining soda muhitini bu döletlerge chüshendürüsh iken.

Xewerge qarighanda, bularning arisida se'udi erebistan, qatar, qazaqistan, malaysiya, afghanistan, tajikistan, pakistan, qirghizistan qatarliq döletlerdin kelgen axbaratchilar asasiy salmaqni igileydiken.

Xewerde neqil qilishiche, se'udi erebistan radiyo-téléwiziye hessidarliq shirkitidin kelgen muhemmed abdulla aldaxil özining xitayning shangxey, béyjing qatarliq jaylirini köp qétim ziyaret qilghanliqini, emma Uyghur élige kélip peqet oxshimaydighan bir menzirini körgenliki bildürgen.

U mundaq dégen: "Chiray, turmush aditi xitayning bashqa jayliridikige tüptin oxshimaydighan Uyghurlargha oxshash xitaydiki musulmanlarni körüp heyranu-hes qaldim."

Qirghizistandin kelgen döletlik téléwiziye istansisining muxbiri Uyghur élidiki tereqqiyatlardin heyran qalighanliqni bildürgen.

Mezkur muxbirlarning Uyghur éli ziyariti xitay Uyghur élide bir belgilime chiqirip "Muhemmed", "Medine" qatarliq musulmanche isimlarni cheklep xelq'araliq inkas qozghighan mezgilge toghra kelgen idi.

Halbuki, xewerde Uyghurlargha qaritilghan diniy we bashqa basturushlar heqqide héchqandaq uchur bérilmigen. Ziyaret qilghuchi muxbirlarmu Uyghur musulmanlargha qaritilghan diniy cheklimiler heqqide toxtalmighan.

Xitay da'iriliri Uyghur élidiki axbaratqa qaritilghan kontrolluqni chingitqandin bashqa, gherb elliri muxbirlirining Uyghur élide erkin aylinip xewer bérishini qolaysizlashturghan.

Xitay Uyghur zhurnalistlarni yazmiliri tüpeyli jazalighandin sirt, Uyghurlar heqqide lilla gep qilghan chet'el muxbirlirinimu zerbe obyékti qilip kelgen.

2015-Yili séntebirdiki "Bay kömürkan hujumini térrorluq hujumi déyishke bolmaydighanliqi" ni bildürgen firansuz muxbir ursila guytér xanim shularning jümlisidin bolup, u, shu yili dékabir xitaydin qoghlap chiqirilghan idi.

Toluq bet