Merkiziy teshwiqat ömikining ürümchi doklati diqqet qozghidi

Xitay hökümitining bashqurushidiki “Tengritagh” torining 11-noyabirdiki xewiride éytilishiche, xitay kompartiyesi merkiziy komitéti biwasite teshkilligen “19-Qurultay 4-omumiy yighinining rohini yetküzüsh merkiziy teshwiqat ömiki” ürümchide doklat bérish yighini achqan. Ömek ezasi, Uyghur diyaridiki birinchi nomurluq hoquqdar chén chüen'go mexsus doklat bérip “Shi jinping dewridiki sotsiyalizim idé'ologiyesi” de ching turushni yene bir qétim alahide tekitligen.

Doklatta chén chüen'go 19-qurultay 4-omumiy yighinining qararida otturigha qoyulghan omumiy telep, omumiy wezipe we bash nishan boyiche tewrenmey ish körüshni alahide tekitligen, shuningdek nöwette “Ikki yüz yilliq” pilanning jiddiy peyti ikenlikini körsitip: “Némide ching turush, némini mustehkemlesh, némini mukemmelleshtürüsh we némini tereqqiy qildurush” tek zor siyasiy mesilide hoshyar bolushni alahide jékiligen.

Bu heqtiki xewerde xitay hökümitining Uyghur diyarida dawam qilip kéliwatqan siyasetlirini téximu keng miqyasta ijra qilish merkiziy téma qilin'ghan bolup, 19-qurultaydin buyanqi omumiy weziyetning téximu qattiq rewishte dawam qilidighanliqidin biwasite bésharet bérilgen.

Xongkongda chiqidighan “Alma kündilik xewerliri” géziti 19-qurultayning 4-omumiy yighini heqqide bergen xewiride xitay-amérika soda urushining tirkiship qélishqa aylinishi, xongkong we teywende körülüwatqan zor siyasiy dawalghush weziyiti, shuningdek shi jinpinggha qarshi küchlerning xitay kompartiyesining ichki qismida pikir ixtilapi körülüwatqanliqidin paydilinip shi jinpingni aghduruwetmekchi bolushi dégendek ehwallarning shi jinpingni aldiritip qoyghanliqini alahide körsetkenidi. Shuningdin uzun ötmey shi jinping “Öz-özi ustidin inqilab qilish, késellikni yilikkiche dawalash, apetni yiltiz tartip bolghuche yoqitish” ni otturigha qoyghan idi.