Мәркизий тәшвиқат өмикиниң үрүмчи доклати диққәт қозғиди

• Мухбиримиз әзиз
  2019-11-12

Хитай һөкүмитиниң башқурушидики “тәңритағ” ториниң 11-ноябирдики хәвиридә ейтилишичә, хитай компартийәси мәркизий комитети биваситә тәшкиллигән “19-қурултай 4-омумий йиғининиң роһини йәткүзүш мәркизий тәшвиқат өмики” үрүмчидә доклат бериш йиғини ачқан. Өмәк әзаси, уйғур дияридики биринчи номурлуқ һоқуқдар чен чүәнго мәхсус доклат берип “ши җинпиң дәвридики сотсиялизим идеологийәси” дә чиң турушни йәнә бир қетим алаһидә тәкитлигән.

Доклатта чен чүәнго 19-қурултай 4-омумий йиғининиң қарарида оттуриға қоюлған омумий тәләп, омумий вәзипә вә баш нишан бойичә тәврәнмәй иш көрүшни алаһидә тәкитлигән, шуниңдәк нөвәттә “икки йүз йиллиқ” пиланниң җиддий пәйти икәнликини көрситип: “немидә чиң туруш, немини мустәһкәмләш, немини мукәммәлләштүрүш вә немини тәрәққий қилдуруш” тәк зор сиясий мәсилидә һошяр болушни алаһидә җекилигән.

Бу һәқтики хәвәрдә хитай һөкүмитиниң уйғур диярида давам қилип келиватқан сиясәтлирини техиму кәң миқяста иҗра қилиш мәркизий тема қилинған болуп, 19-қурултайдин буянқи омумий вәзийәтниң техиму қаттиқ рәвиштә давам қилидиғанлиқидин биваситә бешарәт берилгән.

Хоңкоңда чиқидиған “алма күндилик хәвәрлири” гезити 19-қурултайниң 4-омумий йиғини һәққидә бәргән хәвиридә хитай-америка сода урушиниң тиркишип қелишқа айлиниши, хоңкоң вә тәйвәндә көрүлүватқан зор сиясий давалғуш вәзийити, шуниңдәк ши җинпиңға қарши күчләрниң хитай компартийәсиниң ички қисмида пикир ихтилапи көрүлүватқанлиқидин пайдилинип ши җинпиңни ағдурувәтмәкчи болуши дегәндәк әһвалларниң ши җинпиңни алдиритип қойғанлиқини алаһидә көрсәткәниди. Шуниңдин узун өтмәй ши җинпиң “өз-өзи устидин инқилаб қилиш, кесәлликни йиликкичә давалаш, апәтни йилтиз тартип болғучә йоқитиш” ни оттуриға қойған иди.