Téksas shitatining harris rayonluq soti xitayning Uyghurlargha irqiy qirghinchiliq yürgüzüwatqanliqini békitti

Amérika tashqi ishlar ministirliki 19-yanwar xitayning Uyghurlargha yürgüzüp kéliwatqan jinayitini “Irqiy qirghinchiliq”, “Insani'iyetke qarshi jinayet” dep jakarlighandin kéyin, amérikidila emes, dunya miqyasida zor tesir qozghap, kishilerning xitayning jinayitini esli mahiyitidin tonushigha türtke bolghanidi. 

4-Ayning 12-küni téksas shitatining musulmanlar eng köp jaylashqan rayoni bolghan harris rayonluq soti guwahliq bérish yighini échip, xitayning Uyghurlargha qaratqan her türlük qebih jinayetlirini “Irqiy qirghinchiliq” we “Milliy yoqitish” dep békitken.

15 Minut dawamlashqan guwahliq bérish yighinida téksasta yashawatqan Uyghurlardin  ikki neper guwahchi xitay hökümiti teripidin tutqun qilinip türme-lagérlargha qamalghan we mushu waqqitche iz-dérikini alalmay kéliwatqan yéqinliri heqqide guwahliq bergen. Kishilik hoquq pa'aliyetchisi sara hafiz özi igiligen melumatlargha asasen xitayning Uyghurlargha qaratqan irqiy qirghinchiliq jinayetlirini anglatqan. U mundaq dégen: “Amérikadiki Uyghurlar bizning ulargha diqqet qiliwatqanliqimizni bilidu, biz ularning küreshlirini étirap qilimiz. Bu qétimliq qararning maqullinishi harris rayonidiki her xil jama'etning, bolupmu musapirlar we köchmenlerning Uyghurlarni qollawatqanliqini namayen qilidu”.

Bu guwahliq bérish yighinida yene sot terepning meydani ochuq bildürülüp, xitayning texminen 3 milyon Uyghurni yighiwélish lagérlirigha solap qiynighanliqi, qul ornida ishletkenliki, Uyghurlarning tili, medeniyiti, étiqadini tamamen yoqitishqa urunuwatqanliqi tekitlen'gen؛ amérikadin kéyin kanada, gollandiye, en'giliye qatarliq döletlerning xitayning jinayitini irqiy qirghinchiliq dep békitishning tamamen toghra bolghanliqi qeyt qilin'ghan.