Teywen yüz bergüsi ishghalgha qarshi turush iqtidarini ashurush üchün herbiy manéwir ötküzmekchi

2018-04-25
Élxet
Pikir
Share
Print

Teywen dölet mudapi'e ministirliqi kéler hepte keng kölemlik herbiy manéwir ötküzidighanliqini jakarlighan.

Roytérs agéntliqining xewer qilishiche, bu qétimliq manéwirda teywen ariligha qarita yüz bergüsi ishghalgha taqabil turush asasiy téma qilinidiken.

Gerche teywen dölet mudapi'e ministirliqining bayanatida xitay biwasite tilgha élinmighan bolsimu, emma uningda "Hujum qozghighuchi küchlerning teywenni ishghal qilishi" dégen ibare ishlitilgen. Bu qétimliq manéwirda teywen'ge qarita ishghaliyetchi küchlerning bésip kirgen halitige qarita qayturma hujum élip bérishqa teqlid qilin'ghan urush körünüshi körsitilidiken. Bu arqiliq teywen armiyesining shundaqla munasiwetlik urush téxnikiliri we qural-üskinilerning taqabil turush iqtidari sinaq qilinidiken.

Xitay bilen teywenning munasiwiti yéqinqi bir yildin buyan qattiq yirikleshken. Teywen prézidénti sey yingwén gerche teywen musteqilliqini élan qilish niyiti yoqluqini köp qétim otturigha qoyghan bolsimu, emma xitay teywen'ge tehdit sélishni dawamlashturup kelgen. Xitay terep teywen ariligha yéqin arallargha köp qétim bomba étish, herbiy ayropilanlirini uchurushtek tehdit xaraktérlik heriketlerni köz-köz qilip kelgen.

Roytérs agéntliqining xewiride, teywenning bu qétimliq manéwirni xitay-teywen munasiwetliridiki jiddiychilik bilen munasiwetlik, dep körsetken. Xitay hökümiti yéqinda amérikining teywen emeldarliri bilen bolghan resmiy uchrishishlarni küchke ige qilidighan "Teywen sayahet qanuni" ni maqullishini qattiq tenqid qilip, amérikini "Bir xitay siyasiti" ge emel qilmidi, dep eyibligen idi.

Toluq bet