Teywen parlaméntida Uyghur alaqe guruppisi qurulghan

Teywen parlaménti Uyghur alaqe guruppisi 27-iyun teywen qanun chiqirish palatasida resmiy qurulghanliqini jakarlighan. Melum bolushiche, bu hazirgha qeder chet el parlaméntlirida her xil namlarda qurulghan sekkizinchi “Uyghur dostluq guruppisi” iken. Teywen parlaménti Uyghur alaqe guruppisi teywen parlaméntining hakimiyet béshidiki démokratiye we ilgirilesh partiyesidin bolghan parlamént ezasi shén boyangning bashchiliqida qurulghan.

Melum bolushiche, “Teywen parlaménti Uyghur alaqe guruppisi” ning wezipisi Uyghur kishilik hoquqini qollaydighan her qaysi dölet mejlisliri bilen hemkarliship, mejburiy emgek mehsulatlirining teywen'ge kirishini cheklesh qatarliq mesililerni ilgiri sürüsh, shundaqla “Mezlumlarning kishilik hoquqigha köngül bölüsh” ni teywen parlaméntining tashqi ishlar küntertipidiki eng muhim mesile qatarigha kirgüzüsh bolidiken.

Teywen parlaméntida Uyghur alaqe guruppisining qurulushi, xitayning teywen'ge herbiy tehdit sélishi kücheytken, shundaqla atalmish “Esheddiy teywen bölgünchiliri” ge ölüm jazasi bérish bilen tehdit séliwatqan bir waqitqa toghra kelgen. Radiyomiz xitay bölümining xewer qilishiche, “Teywen parlaménti Uyghur alaqe guruppisi” ning 27-iyun künidiki qurulush murasimida yighin ehli “Teywen'ge kishilik, Uyghurlargha erkinlik” dep sho'ar towlighan. “Teywen parlaménti Uyghur alaqe guruppisi” ning re'isi shén boyang “Teywen béyjingning Uyghurlargha irqiy qirghinchiliq qilishi, uning tibet we xongkongdiki kishilik hoquq depsendichiliklirige qarap turmasliqi kérek. Eger teywen bügün ornidin turmisa, uning buningdin kéyin ornidin turush pursiti bolmaydu” dégen.

Shén boyangning tekitlishiche, u teywen parlaméntining kishilik hoquq mesilisige awaz chiqiripla qalmay, belki kishilik hoquqning teywen parlaméntining tashqi siyaset küntertipige kirgüzülüshini ümid qilidiken. Shén boyang mundaq dégen: “Pütün dunyadiki démokratik döletler küchini birleshtürgendila, andin istibdatliqning tajawuzigha taqabil turalaymiz”.

 Melum bolushiche, “Teywen parlaménti Uyghur alaqe guruppisi” ning qurulush murasimigha teywen parlaméntining re'isi xen goyüge wakaleten parlaméntning mu'awin bash katipi jang yürong qatnashqan. Murasimgha yene dunya Uyghur qurultiyi, Uyghur kishilik hoquq qurulushi, yaponiye Uyghur jem'iyiti qatarliq teshkilatlar wekillirining ishtirak qilghanliqi qeyt qilinmaqta.