Teywende “Sherqiy türkistan: Uyghurlarning heqiqiy dunyasi” namliq yéngi kitab neshirdin chiqqan

Muxbirimiz qutlan
2016-09-17
Share


Igilishimizche, yéqinda teywenning “Awan'gart” neshriyati “Sherqiy türkistan: Uyghurlarning heqiqiy dunyasi” namliq yéngi kitabni neshir qilip tarqatqan.

Mezkur kitab hür tengritagh texellusluq aptor teripidin xitay tilida yézilghan bolup, teywen we xongkongda ishlitilidighan addiylashturulmighan kona xitay yéziqida neshir qilin'ghan.

Bu kitab 10 babtin teshkil tapqan bolup, deslepki ikki babida xitaylar “Shinjang” dep atawatqan bu zémindiki milletler we bu tupraqning xitay xeritisige qachan we qandaq shara'itta kirip qalghanliqi heqqide bayan bérilgen. Kitabning asasliq mezmuni shimaliy militaristlar, gomindang we xitay kompartiyesi hökümranliqi dewridiki Uyghurlarning milliy qutulush küreshliri yorutilghan. Axiriqi ikki babida chet'ellerdiki Uyghur teshkilatlirining pa'aliyetliri we xitaylarning “Jungxwa birliki” nezeriyesi asasidiki xitay milletchiliki heqqide mulahiziler élip bérilghan.

“Awan'gart” neshriyatining mezkur kitab heqqidiki tonushturishida mundaq déyilgen: “Bu kitab xitay tili dunyasida birinchi qétim "jungxwa birliki" idiyesidin mustesna halda Uyghurlarning nuqtisidin sherqiy türkistanning tarixi, medeniyiti we siyasiy muhiti sherhiylen'gen muhim eserdur.

“Awan'gart” neshiryati mezkur kitabning aptori hür tengritagh heqqide tepsiliy melumat bermigen. Peqetla aptorning Uyghur diyaridiki melum bir aliy mektepte xizmet qilidighan, chongqur bilimge ige Uyghur ziyaliysi ikenlikini eskertken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet