Xitayning “Yer shari waqti géziti” “Teywenni qoral küchige tayinip qayturuwélish kérek” dédi

Amérikadiki prézidént saylimining ghalibi donald tramp aldinqi künidiki bir sözide amérikaning “Bir junggo” siyasitige baghlinip qélish zörüriyiti yoqluqini éytqandin kéyin, xitay buninggha qattiq narazi bolup, “‛bir junggo siyasiti‚ bizning washin'gton bilen bolghan barliq munasiwetlirimizning asasi”, dégen idi.

Peyshenbe küni xitayning“Yer shari waqti géziti” bir bash maqale élan qilip, “Merkizi hökümet choqum teywen'ge tutqan pozitsiyesini qaytidin tengshishi, qoral küchini eng asasiy hel qilish charisi, dep qarap diqqet bilen teyyarliq körüshi lazim” dégenni ilgiri sürdi.

En'gliyening “Gwardi'an” géziti bu heqtiki xewiride, “Yer shari waqti géziti” ning xitay kompartiyesige qarashliq bir metbu'at orgini hésablinidighanliqi, shunga uningda élan qilin'ghanlarning partiyining köz qarishini eks ettüridighanliqini bildürgen. Uningda éytilishiche, yuqiridiki bash maqalide, xitay hökümiti choqum teywenni qoral küchige tayinip qayturup élishtek iradisini namayan qilishi kérek, dep yézilghan.

Trump bilen xitay arisida kélip chiqqan bu detalash xelq'arada küchlük diqqet qozghidi. Bezi közetküchiler amérikaning démokratik teywen bilen yéqinlishishini qarshi alsa, beziler buning ikki dölet menpe'itige élip kélidighan netijisige guman bilen qarimaqta.