Teywen dölet mudapi'e ministiri xitayning teywenni qamal qilishini “Urush herikiti” dédi

Xitayning aldinqi hepte élip barghan manéwiridin kéyin, teywen dölet mudapi'e ministiri wéllin'gton ko (Wellington Koo) charshenbe küni xitayning teywenni qamal qilishining emeliyette bir urush herikiti ikenlikini, xelq'ara sodigha zor tesirlerni élip kélidighanliqini ilgiri sürgen.

“Roytérs agéntliqi” ning 10-ayning 23-künidiki xewirige asaslan'ghanda, teywen dölet mudapi'e ministiri wéllin'gton ko mundaq dégen: “Men shuni tekitlimekchimenki, manéwir bilen qamal qilish pütünley oxshimaydu. Yer shari mallirining beshtin biri teywen boghuzidin ötidu. Qamal qilish peqet teywen'gila tesir qilipla qalmastin dunyagha tesir qilidu. Xelq'ara jem'iyet buninggha qarap turmasliqi kérek”.

Teywen dölet mudapi'e ministirliqi xitay awiyamatka etritining teywen boghuzidin ötüp, teywen kontrolluqidiki pratas ariligha yéqin sudin ötkendin kéyin, shimal terepke mangghanliqini éytqan. Ministirliqning éytishiche, seyshenbe küni kechte xitayning eng chong awiyamatkisi bolghan “Lyawning” bashchiliqidiki xitay paraxotliri bayqalghan bolup, teywen qisimliri bu paraxot etritini nazaret qilghan.

Ilgiriki xewerlerdin melum bolghinidek, amérika déngiz armiyesi da'im teywen boghuzidin ötüp teywenni qollap, erkinlikini teshebbus qilip kelgen bolup, kanada, gérmaniye we en'gliye qatarliq bashqa ittipaqdash döletlermu mushuninggha oxshash wezipilerni orunlap, béyjingning ghezipige uchrighanidi.