“Tyen'enmén qirghinchiliqi” xatiriside Uyghurlar diyaridiki xitay emeldarlirini jazalash chaqiriq qilindi

• 
  2019-06-04

Bu yil 4-iyun küni 1989-yilidiki “Tyen'enmén qirghinchiliqi” ning 30 yilliq xatirisi. Amérika xelq'ara diniy étiqad erkinliki komitéti bu munasiwet bilen mexsus bayanat élan qilip, amérika hökümitini Uyghurlar diyaridiki diniy étiqad erkinlikini depsende qilishta mes'uliyiti bolghan bir qisim xitay emeldarlirigha jaza bérishke chaqirdi. Ular buningda özlirining “Yershari magnétiski qanuni” ni közde tutuwatqanliqini alahide eskertti.

4-Iyun küni élan qilin'ghan bayanatta mezkur komitétning re'isi ténzén dorji “Bextke qarshi1989-yili 4-iyundiki bu weqe xitay hökümitining öz hökümranliqidiki milyonlighan kishilerning, jümlidin diniy étiqad bilen shughullan'ghuchi kishilerning heq we hoquqlirini payxan qilishta qilche ikkilinip qalmaydighanliqidin roshen bisharet bergen idi. Derweqe bügün xitay hökümiti milyonlighan Uyghur musulmanlirini tutqun qildi. Ibadetgah süpitide xizmet qiliwatqan meschitler, chérkawlar, tibet butxanilirigha tajawuz xaraktérdiki közitish üskünilirini köplep ortatti” dep körsetti.
Bayanatta mezkur komitét 2019-yili élan qilghan yilliq doklatta Uyghurlar diyaridiki siyasiy basturush we diniy ziyankeshlik pa'aliyetlirige biwaste jawabkar bolghan bir türküm xitay emeldarlirini, jümlidin Uyghurlar diyaridiki partiye sékrétari, xitay kompartiyesi merkiziy komitéti siyasiy byurosining ezasi chén chu'en'goni “Yershari magnétiski qanuni” boyiche jazalash tekliwi bir qétim otturigha qoyulghanliqi, chén chu'en'goning bolsa tibettiki waqitlardila buddistlargha ziyankeshlik qilishta köp ishlarni qilghanliqi alahide tekitlinidu.

Bayanatning axirida ténzén dorji“Bu xildiki qebih qilmishlargha hemde milyonlighan bigunah awamning heqlirini depsende qilish qilmishlirigha tramp hökümiti qol qowushturup qarap tursa bolmaydu. Hazir bu qilmishqa mes'ul xitay emeldarlirigha jaza qollinishning peyti yétip keldi,” dep alahide körsitidu.