«Тик-ток» ферузә әзизниң уйғурлар һәққидики ведийосини чәклигәнликидин кәчүрүм сориған

Мухбиримиз әркин
2019-11-28
Елхәт
Пикир
Share
Принт

Иҗтимаий таратқу юмтали «тик-ток» ферузә әзизиниң хитайниң уйғурларға тутқан муамилисини тәнқидләп елан қилған ведийосини чәклигәнликидин кәчүрүм сориған.

Ройтерс агентлиқиниң хәвәр қилишичә, «тик-ток» ферузә әзизниң ведийосниң елип ташлинишини «шәхси сәвәнлик» кәлтүрүп чиқарғанлиқи, нөвәттә ведийониң әслигә кәлтүрүлгәнликини билдүргән.

Американиң йеңи җерсей штатидики 17 яшлиқ мусулман қиз ферозә әзиз өзиниң тик-ток һесабатида кирпик қайриш тактикисини өгитишни васитә қилип, 40 секунтлуқ бир ведийо тарқатқан. Ферузә әзиз ведийода қиз-аялларға кирпик қайриш усулини өгинивелишни тәвсийә қилип, арқидинла «һазир хитайда немиләр болуватқанлиқиға диққәт қилиңлар,» дегән. У ведийосиниң кейинки қисмида хитайниң милйонлиған уйғурни лагерларға солиғанлиқи, лагерларда қиз-аялларға басқунчилиқ қилиш, тутқунларға мәҗбурий чошқа гөши йегүзүш, һарақ ичкүзүш, тән җазаси қатарлиқ вәһшийликләрниң елип бериливатқанлиқини чүшәндүргән. Униң ведийоси таратқуларда ғулғула қозғап, көрүш қетим сани бир милйон 600 миңға йәткән. Лекин «тик-ток» бу ведийони дәрһал чәклигән иди. Бу вәқә «тик-ток» абунтлириниң шәхси учури мәсилиси америка дөләт мәҗлисиниң диққитини қозғаватқан мәзгилдә йүз бәргән.

Йеқинда дөләт мәҗлисиниң қармиқидики бир комитет «тик-ток» тоғрисида гуваһлиқ йиғини чақиришни тәләп қилған иди. Ройтерс агентлиқиниң хәвиридә тәкитлишичә, «ток-ток» ниң америкадики ишханисиниң бихәтәрлик ишлириға мәсул директори әрик хән «өзлири кәлтүрүп чиқарған сәвәнлик үчүн кәчүрүм сорайдиғанлиқи» ни билдүрүп, «23‏-ноябирдики ведийо шәхси хаталиқ сәвәбидин елип ташланди. Лекин шуни тәкитләп өтүш муһимки, ширкитимизниң көрсәтмисидә буниңдәк ведийоларни чәкләш дәйдиған бир қаидә йоқ. Бу ведийо елип ташланмаслиқи керәк иди,» дегән.

Пикирләр (0)
Share
Толуқ бәт