Xitayning tiktokni élon maskqa sétip bérishi mumkinliki texmin qilinmaqta

Bash ishtabi xitaydiki tiktok shirkitining amérikada cheklinish yaki amérika shirketlirige sétilish teqdiri yéqinlishiwatqan bir mezgilde, xitayning bu shirketni qutuldurush üchün uni amérikaliq meshhur karxanichi, dunyadiki eng chong bay élon maskqa sétip bérishi mumkinliki perez qilinmaqta.

“Blombérg xewerliri” tori 13-yanwar élan qilghan bu xewerde déyilishiche, xitay emeldarliri tiktokning teqdirini bir terep qilish üstide jiddiy tallashqa duch kelgen. Ichki ehwalni bilidighanlarning éytishiche, eger tiktok amérikaning cheklesh buyruqini emeldin qalduralmighan teqdirde, xitay emeldarliri uning amérikadiki mulazimitini dangliq karxanichi élon maskqa sétip bérishi mumkin iken.

Tiktok shirkiti amérika aliy sotidin, tiktokni cheklesh buyruqini bikar qilishni telep qilghan bolsimu, bash sotchi 1-ayning 10-küni qilghan sözide, eslidiki buyruqni saqlap qélishi mumkinlikini éytqan.   Buningdin ilgiri, amérika pirézidénti donald trampning tiktokni saqlap qélishqa iltimas qiliwatqanliqi, emma amérika aliy sotining uni ret qilish éhtimali barliqi heqqide xewerler chiqqanidi.

“Blombérg xewerliri” ning melumat bérishiche, xitay emeldarliri nöwette tiktokni sétish mesiliside, pirézidént donald trampning eng yéqinliridin birige köz tikiwatqan bolup, u bolsimu donald trampning saylimigha 250 milyon yardem qilghan élon mask iken. Eger élon mask tiktokning amérikadiki mulazimitini sétiwalsa, eng chong ijtima'iy alaqe supiliridin X bilen tiktokqa teng ige bolup, ularning tijaritini teng bashquridiken. Nöwette tiktokning amérikadiki abontliri 170 milyondin ashidighan bolup, bundaq zor kölemdiki abont sani X ning tijaritinimu ronaq tapquzidiken. Emma xitay emeldarlirining élon mask bilen qandaq sodilishidighanliqi, bahani qandaq békitidighanliqi, eng muhimi élon maskning bu sodigha qandaq qaraydighanliqi éniq emes iken. Élon mask yaki uning wekilliri buninggha téxi inkas qayturmighan. Emma élon mask X de yazghan uchurida, “ Tiktokning cheklinishi gerche X qa paydiliq bolsimu,  méningche, tiktok amérikada cheklenmesliki kérek. Bundaq qilish pikir erkinlikige xilap” dégen.