Tik-tokning xitaydiki bash shirkiti baytdens amérikaliq zhurnalistlarni mexpiy közetken

Washin'gtondin muxbirimiz irade teyyarlidi
2024.03.14

Tik-tok ep détalining xitaydiki bash shirkiti bolghan baytdens (ByteDance) amérika forbis zhurnilining muxbirlirini teqibligen.

“Forbés” zhurnilining xewiride déyilishiche, baytdens shirkiti “Forbis” zhurnilining bir qanche muxbirini teqib qilip, ularning IP adrési we abont melumatlirigha ruxsetsiz érishken hem ularning turushluq ornini éniqlighan. Ilgiri “Bazfid” zhurnilidimu ishligen bu 3 muxbir ilgiri tik tok ep détalining bash shirkiti baytdensning xitay hökümiti bilen bolghan munasiwitini ashkarilaydighan xewerlerni ishligen bolup, baytdens ularni teqiblesh arqiliq bu muxbirlarning shirket ichidiki alaqe menbelirini tépip chiqishqa urun'ghan.

“Forbés” zhurnili ötken yil öktebirde, baytdesning amérikaliq abontlarni teqiblesh herikiti we uning xitay hökümiti bilen bolghan munasiwiti heqqide keng da'irilik tekshürüsh doklati élan qilghan iken. Eyni chaghda baytdens we tik-tok shirketliri bayanatida “Shirket ezeldin amérika hökümitining her qandaq ezasi, pa'aliyetchiler we jama'et erbablirini teqiblimigen” dégen. Halbuki, “Forbés” ning baytdens shirkitidiki xizmetchilerning öz'ara yézishqan xetliridin bayqishiche, baytdens emeliyette köp qétim amérikaliq abontlarni teqiblep, ularning uchurlirigha érishken iken.

Bu, tik-tok shirkiti emeldarining “Xitaydiki bash shirket amérikaliq abontlarning sanliq melumatlirigha érishelmeydu” dégen sözining put tirep turalmaydighanliqini körsitip béridiken.

“Forbés” zhurnilining tehrirat diréktorliri yuqiridiki weqege inkas qayturup, “Bu erkin axbarat idiyesi we uning démokratiyediki halqiliq roligha qilin'ghan biwasite hujum” dégen. U yene sözide baytdens shirkitining buninggha bir jawab bérishi lazimliqini eskertip “Bu ularning tik-tok abontliridin toplighan uchurlar bilen néme qiliwatqanliqi toghrisida négizlik so'allarni peyda qilidu” dep agahlandurghan.

Amérikaliq siyasetchiler tik-tokning amérikaliqlarning xususiy bixeterliki we dölet bixeterlikige éghir tehdit peyda qiliwatqanliqini nezerde tutup, uni cheklesh üchün heriketke ötken idi. 13-Mart küni amérika awam palatasi tik-tokni baytdens shirkitidin ayrilip chiqishqa mejburlaydighan, undaq bolmighan teqdirde uni pütünley chekleydighan qanun layihesini mutleq köp awaz bilen maqullidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.