Үрүмчи төмүр йол идариси 2017-йиллиқ чаған мәзгилидә 3 милюн 800 миң йолучи тошуйдиғанлиқини мөлчәрлигән

Үрүмчи төмүр йол идариси 2017-йиллиқ чаған мәзгилидә уйғур елидин үч милйон 800 миң йолучи тошуйдиғанлиқини мөлчәрлимәктикән. Буни бултурқи охшаш вақитқа селиштурғанда көпийиш нисбити 20 пирсәнткә йеқинлишидикән.

Хәлқ ториниң бу һәқтики хәвиригә қариғанда, үрүмчи төмүр йол идарисиниң чаған мәзгилидә уйғур елидин хитай өлкилиригә вә уйғур аптоном райониниң ичкий қисмида йолучи тошуш хизмити 1-айниң 13-күнидин башлинип, 2-айниң 21-күни ахирлишидикән.

Йолучи тошуш җәмий 40 күн давамлишидиған болуп, күнигә тәхминән 95 миң йолучи тошуш мөлчәрләнмәктикән. Буниң ичидә уйғур аптоном районидин хитай өлкилиригә тошулудиған йолучи 850 миң, уйғур аптоном райони даириси ичидики йолучи икки милйон 950 миңға йетидикән.

Игилинишичә, һәр йили чағанниң алди-кәйнидики вақит уйғур дияридики төмүрйол қатнишида еғир бесим пәйда болидиған мәзгил икән. Уйғур дияриға пул тапқили чиққан хитай ишләмчилири билән чаған өткүзгили хитай өлкилиригә қарап йолға чиққан хитай йолучилар төмүрйол қатнишиға җиддий бесим елип келидикән.

Көзәткүчиләр, хитай төмүрйол идариси елан қилған 3 милюн 800 миң йолучиниң уйғур дияриға нисбәтән аз сан әмәсликини, хитай һөкүмитиниң йеқинқи йиллардин буян зор көләмдики хитай аһалисини уйғур дияриға олтурақлаштуруп, бостанлиқ көлими интайин кичик болған бу земинда әслидики йәрлик аһалиларни иккиләмчи орунға чүшүрүп қойғанлиқини илгири сүрмәктә.