Хитай мәмликәтлик хәлқ қурултийи “тор бихәтәрлики қануни” ни мақуллиған

Хитай мәмликәтлик хәлқ қурултийи бүгүн, йәни 7-ноябир күни “тор бихәтәрлики қануни” ни рәсмий мақуллиған болуп, бу қанун келәр йили 6-айниң 1-күнидин етибарән күчкә игә болидикән.

“тор бихәтәрлики қануни” да мундақ дейилгән: “торда дөләтниң бихәтәрлики, хәлқниң иттипақлиқиға зәрәр йәткүзидиған, иқтисадий тәртипни қалаймиқан қилидиған яки сотсиялистик түзүмни ағдурушқа урунидиған һәрқандақ мәзмун қаттиқ чәклиниду.”

Игилинишичә, хитай тор қолланғучиларниң сани бойичә дунядики әң чоң дөләт болуп, һазир хитайда тәхминән 710 милйон киши тордин пайдилинидикән.

Хитайниң “тор бихәтәрлики қануни” ни мақуллиши хитай ичи вә хәлқарадики кишилик һоқуқ паалийәтчилирини қаттиқ тәшвишкә салған болуп, улар мәзкур қанун әмәлийәттә даириләрниң сиясий җәһәттики контроллуқини техиму күчәйтиветиду, дәп қаримақтикән. Чәтәл ширкәтлириму хитайниң мәзкур қануни “хәлқара сода вә тиҗарий йеңилиқларға тосалғу пәйда қилиду” дәп әндишиләнмәктикән.

Хәлқара кәчүрүм тәшкилатиниң хитай ишлири тәтқиқатчиси патрик пун бу һәқтә пикир баян қилип мундақ дегән: “хитай мақуллиған тор бихәтәрлики қануни даириләрниң интернеттики қамалини йәниму чиңитиветиду. У, хитайниң интернет ториға болған чәклимисини қанунлаштурушқа урунушиниң бир ипадиси, халас.”

Уйғур көзәткүчиләр билән сиясий анализчиларму хитай мақуллиған “тор бихәтәрлики қануни” ниң уйғур елидики тор қолланғучиларға техиму зор хирис елип келидиғанлиқини тәкитлимәктә.