Xitay memliketlik xelq qurultiyi “Tor bixeterliki qanuni” ni maqullighan

Xitay memliketlik xelq qurultiyi bügün, yeni 7-noyabir küni “Tor bixeterliki qanuni” ni resmiy maqullighan bolup, bu qanun kéler yili 6-ayning 1-künidin étibaren küchke ige bolidiken.

“Tor bixeterliki qanuni” da mundaq déyilgen: “Torda döletning bixeterliki, xelqning ittipaqliqigha zerer yetküzidighan, iqtisadiy tertipni qalaymiqan qilidighan yaki sotsiyalistik tüzümni aghdurushqa urunidighan herqandaq mezmun qattiq cheklinidu.”

Igilinishiche, xitay tor qollan'ghuchilarning sani boyiche dunyadiki eng chong dölet bolup, hazir xitayda texminen 710 milyon kishi tordin paydilinidiken.

Xitayning “Tor bixeterliki qanuni” ni maqullishi xitay ichi we xelq'aradiki kishilik hoquq pa'aliyetchilirini qattiq teshwishke salghan bolup, ular mezkur qanun emeliyette da'irilerning siyasiy jehettiki kontrolluqini téximu kücheytiwétidu, dep qarimaqtiken. Chet'el shirketlirimu xitayning mezkur qanuni “Xelq'ara soda we tijariy yéngiliqlargha tosalghu peyda qilidu” dep endishilenmektiken.

Xelq'ara kechürüm teshkilatining xitay ishliri tetqiqatchisi patrik pun bu heqte pikir bayan qilip mundaq dégen: “Xitay maqullighan tor bixeterliki qanuni da'irilerning intérnéttiki qamalini yenimu chingitiwétidu. U, xitayning intérnét torigha bolghan cheklimisini qanunlashturushqa urunushining bir ipadisi, xalas.”

Uyghur közetküchiler bilen siyasiy analizchilarmu xitay maqullighan “Tor bixeterliki qanuni” ning Uyghur élidiki tor qollan'ghuchilargha téximu zor xiris élip kélidighanliqini tekitlimekte.