Krostofér rey: “Xitay xakkérliri amérikaning halqiliq ul eslihelirige ‛buzghunchiliq‚ qilishqa teyyarliq qilmaqta”

Amérika fédératsiye tekshürüsh idarisi (FBI)ning bashliqi kristofir rey (Christopher Wray) xitay xakkérlirining amérikaning halqiliq ul eslihelirige “Buzghunchiliq” qilishqa teyyarliq qiliwatqanliqni ilgiri sürgen.

CNN Ning 2024-yili 1-ayning 31-künidiki xewirige asaslan'ghanda, kristofir rey bügün amérika dölet mejlisi xitay ishliri komitétida qilghan sözide mundaq dégen: “Xitay xakkérliri amérikagha ‛buzghunchiliq qilish‚ we ‛dunyagha ziyan yetküzüsh‚ bilen meshghul bolmaqta. Xitay xakkérliri yene amérika ul eslihelirige buzghunchiliq qilish we amérika puqralirigha ziyan yetküzüsh üchün teyyarliq qilmaqta.”

CNN Ning xewer qilishiche, ötken yili noyabirda ötküzülgen baydén-shi uchrishishida, xitay pirézidénti shi jinping amérika pirézidénti jow baydén'gha xitayning 2024-yildiki amérika saylimigha arilashmaydighanliqi toghriliq kapalet bergen. Melum bolushiche, xitay tashqi ishlar ministiri bu kapaletni ötken heptining axirida baydénning dölet xewpsizlik meslihetchisige qayta-qayta tekitligen. Amérika emeldarliri nöwette shi jinpingning bu sözige emel qilghan-qilmighanliqini yéqindin közetmektiken.

Bu heqte FBI ning bashliqi kristofir rey mundaq dégen: “Xitay bu bir nechche yilda nurghun ishlargha wede berdi, emma men bularning emelileshkenlikini körsem, andin ishinimen.”

Xewerde déyilishiche, eger xitay teywen'ge tajawuz qilghan ehwal astida, amérikaning buninggha tosqunluq qilishining aldini élish üchün xakkérliq hujumi qozghap, port we qatnash tori qatarliq sezgür halqiliq ul eslihelerge téximu ichkirilep kirishi mumkin iken.

Kristofir rey sözning axirida, xitayning yuqiri téxnikiliq sün'iy eqil wasitilirini qollinip qara qulini amérikagha qeder uzatqanliqi, amérikaliqlarning négizlik erkinlikige hujum qilghanliqi we amérikaliqlargha tehdit peyda qilghanliqini alahide tilgha alghan, shundaqla xitayni qattiq agahlandurghan.