Xitay amérikini tor buzghunchiliqi bilen eyiblidi

Amérika dölet mudapi'e ministirliqi xitay toghriliq herbiy doklat élan qilghandin kéyin, xitay hökümiti amérikini charshenbe küni yene dawamliq tenqid qildi.

Xitay kompartiyisining awazi - “Xelq géziti” charshenbe küni maqale élan qilip, heqiqiy tor buzghunchisi amérikining özi, dep körsetken. Uning xitay bilen qoshna eller arisigha ixtilap séliwatqanliqini ilgiri sürgen.

Amérika dölet ishlar ministirliqi düshenbe küni doklat élan qilip, xitayning herbiy küchini dawamliq kéngeytishi, uning sherqiy we jenubiy déngizdiki herbiy pa'aliyiti qoshna ellerni bi'aram qiliwatqanliqini bildürgen. Uning yene, amérika ammiwi we herbiy kompyutér séstimisigha hujum qilip, jasusluq pa'aliyitini herbiy zamaniwiylishishqa serp qiliwatqanliqini ilgiri sürgen idi. Xitayning “Azadliq armiye géziti” besh burjeklik binaning doklatini “Junggoning ichki ishlirigha qopalliq bilen arilashqanliq” dégen. Amérika dölet mudapi'e ministirliqi özining doklatida, tunji qétim tor hujumining xitay hökümiti we armiyisi bilen chétishliq ikenlikini ashkara otturigha qoyghan idi. Amérika mendiyant tor bixeterlik shirkiti bu yil 2 - ayda élan qilghan doklatida, tor hujumini azadliq armiyining shangxeyde turushluq bir qisimi élip barghanliqini ilgiri sürgen. Kaspariskiy namliq yene bir shirket, xitay tor buzarlirining d u q tori we qurultay xadimlirining élxet sanduqigha köp qétim hujum qilghanliqini bildürgen.