Хитай иҗтимаий алақә васитилиридики "чәмбирәк" контрол қилишни йәнә күчәйтти

Хитай дөләтлик тор учур ишханиси 7‏-сентәбир йеңи бәлгилимә чиқирип, иҗтимаий алақә васитилириниң "достлар чәмбирики", блог вә топлиридики учур, муназириләрни контрол қилишни давамлиқ күчәйтти.

Ройтерс агентлиқиниң хәвиридә қәйт қилишичә, бу бәлгилимә хитай компартийәсиниң бу йил 11‏-айда чақирилидиған 19-қурултийи билән мунасивәтлик болуп, униң мәқсити "достлар чәмбирики" вә "иҗтимаий топлар" дики назук темиларға аит учур, муназириләрни контрол қилишкән.

Бәлгилимидә, тор мулазимити қилидиған ширкәтләр херидарлириниң һәқиқий кимлики билән торға киришини назарәт қилиш, блог, "достлар чәмбирики", "иҗтимаий топ" тики достларниң өз ара йоллиған учур вә күндилик алақә хатирисини аз дегәндә 6 ай сақлиши тәләп қилинған.

Униңда йәнә, тор мулазимәт ширкәтлириниң кредит системисини йолға қоюп, тор қолланғучиларға уларниң кредит карта номуриға қарап мулазимәт қилиш, қаидигә хилаплиқ қилған топларниң номурини тартиш, кредит номури төвәнләргә мулазимәт қилишни тохтитиш вә алақидар һөкүмәт органлириға мәлум қилиш тәләп қилинған.

Хитай дөләтлик тор учур ишханисиниң уқтурушида көрситишичә, мәзкур бәлгилимә бу йил 8‏-өктәбирдин башлап рәсмий иҗра қилинишқа башлайдикән.

Лекин бәзи көзәткүчиләрниң илгири сүрүшичә, бу бәлгилимә уйғур районида хели бурун иҗра қилинип, үндидар, QQ, тйеба, алипай қатарлиқ иҗтимаий алақә васитиләр қаттиқ контрол қилинған. Нурғун уйғурлар үндидар, QQ қатарлиқларға учур йоллап яки учур тапшурувелип қолға елинип кәткән.

Көзәткүчиләр, уйғур районида йолға қоюлған бәзи тәдбирләр бу қетим хитайниң пүтүн мәмликәт миқясиға кеңәйтилгәнликини билдүрди.

Йеңи бәлгилимидә йәнә, достлар чәмбирики, иҗтимаий топларни ким қурған болса, башқурушқа шуниң мәсул болидиғанлиқи әскәртилип,"топниң игиси ким болса яки топни ким башқурса шу мәсул болуши керәк" дейилгән.

Буни бесиш арқилиқ, пикриңизни йезиң

• Принт
• Һәмбәһр
• Әвәтиш

Барлиқ пикир - баянларни көрүш.

• Бүгүнки аңлитиш
• Илгирики аңлитишлар