Уйғур аптоном районида тор қануниға «хилаплиқ қилған» 14 дело бир тәрәп қилинған

Мухбиримиз әркин
2020-06-15
Share

Йеқинда уйғур аптоном районлуқ тор учур башқуруш ишханиси билән җамаәт хәвпсизлик назарити тор учур қануниға «хилаплиқ қилған» 14 делони бир тәрәп қилған.

Бу 14 делониң иккиси торда корона вируси юқуми вә ақту наһийәсиниң қамал қилинғанлиқи һәққидә учур тарқатқанлиқи сәвәблик җазаланған. Бу мәзкур районда тор учур қануниға хилаплиқ қилиш билән әйиблинип бир тәрәп қилинған 27-түркүмдики 14 делодур. Бу 14 дело бу йил 3-айниң бәшидин 5-айниң оттурилириғичә болған 2 йерим ай җәрянида ақсу, санҗи, қәшқәр, үрүмчи қатарлиқ җайларда садир болған икән.

«Тәңритағ» ториниң 14-июн ашкарилишичә, дело садир қилғучиларниң бири қәшқәр шәһиридә турушлуқ бир хитай пуқраси болуп, у бу йил 3-айниң 29-күни иҗтимаий алақә топида «ақту наһийәсидики дукандарлар дукан ачалмайду, ақту наһийиси қамал қилинидиған болди» дәп учур тарқатқан. Йәнә бири санҗида турушлуқ хитай болуп, у бу йил 3-айниң 28-күни «қумулда бир нәпәр корона вируси юқумдари байқалди» дәп учур тарқатқан икән. Хитай даирилири әйни вақитта уйғур районидики корона вируси юқум әһвалини қаттиқ контрол қилип, кишиләрниң буниңға даир учурларни тарқитишини қаттиқ чәклигән иди.

«Тәңритағ» ториниң тәкитлишичә, бу қетим җазаланған қалған делолар торда қоймичилиқ қилиш, қимар ойнаш, сериқ рәсим чаплаш қатарлиқ қилмишларға алақидар икән. Хәвәрдә бу кишиләрниң бәзилиригә мәмурий тутуп туруш җазаси берилгәнлики, лекин қумулда корона вируси юқумдариниң байқалғанлиқи, ақту наһийәсиниң қамал қилинғанлиқи һәққидә учур тарқатқан хитайларға тәнқидләш тәрбийәси берилгәнликини билдүргән. Әмма конкрет қандақ тәнқидләш тәрбийәси берилгәнликини тилға алмиған. Мәлум болушичә, юқириқи 14 кишиниң 5 нәпири уйғур, бир нәпири шибә икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт