Хитай һөкүмити хитайлар билән уйғурларниң өз-ара тойлишишини күчәп тәшвиқ қилмақта

Мухбиримиз сада
2019-04-24
Елхәт
Пикир
Share
Принт

Хитай һөкүмити йеқиндин уйғур районида милләтләр ара тойлишиш тәшәббусини базарға селип, хитай әрләрниң уйғур қизлири билән никаһлинишини күчәп тәшвиқ қилишқа башлиған.

Алдинқи күнләрдә иҗтимаий таратқуларда хитайлар билән уйғурларниң өз-ара тойлишиш һәққидики бир тәшвиқат син филими тарқалған иди. Мәзкур син көрүнүштә уйғур дияриниң әзәлдин милләтләр арилишип яшап кәлгән бир җай икәнлики, нурғун гүзәл һәм лаяқәтлик уйғур қизлириниң өзини «сараңларчә» яхши көридиған хитай әрләргә ятлиқ болушни халайдиғанлиқини тәшвиқ қилинған.

Син көрүнүштә йәнә районда охшимиған милләтләр өз-ара тойлашса болмайдиғанлиқ һәққидә һечқандақ бир чәклиминиң йоқлуқи, көплигән уйғур қизлириниң хитай тили вә мәдәнийитидин толуқ хәвәрдар икәнлики алаһидә тәкитләнгән.

Мәзкур син көрүнүш тарқалғандин кейин көплигән инкасларни пәйда қилған. Австралийә латроби университетиниң профессори җәймис лейболд инкас билдүрүп, дунядики башқа җайларға қариғанда уйғур районида охшимиған милләтләр ара тойлишишниң интайин сәзгүр һәм кәм учрайдиған бир әһвал икәнликини илгири сүргән.

Уйғур дияридики җаза лагерлириға соланған милйонлиған тутқунлар ичидә уйғур әрләрниң юқири салмақни игиләйдиғанлиқи илгири сүрүлүватқан бир пәйттә хитай һөкүмитиниң бу хил тәшвиқатни күчәйтиши чәтәлләрдики көзәткүчиләрниң диққитини қозғимақта. Улар буни хитайниң уйғурларни нопус җәһәттин тизгинлиши вә уларни пүтүнләй хитайчилаштуруштики бир тактикиси дәп һесаблимақта.

Пикирләр (0)
Share
Толуқ бәт