Хитай һөкүмити уйғурлар билән хитайларниң тойлишишини риғбәтләндүрүш үчүн һәр хил қулайлиқ сиясәтләрни чиқармақта

Мухбиримиз әркин
2019-05-17
Елхәт
Пикир
Share
Принт

Хитай һөкүмити уйғурлар билән хитайларниң никаһлинишини ишқа ашуруп, ассимилятсийәни тезлитиш үчүн һәр хил қулайлиқ сиясәтләрни чиқармақта.

Фирансийә агентлиқиниң хәвәр қилишичә, уйғур райони бәлгилимә чиқирип, уйғур вә хитай ана-анидин туғулған балилар алий мәктәпкә имтиһан бәрсә 20 номур қошуп беришни йолға қойған. Хитай һөкүмити бурун хитай тилида имтиһан бәргән уйғурларға 50 номур қошуп берәтти. Лекин бу бәлгилимә өткән йили бикар қилинған. Фирансийә агентлиқиниң 17‏-май бәргән хәвиридә қәйт қилинишичә, йеңи бәлгилимидә уйғур вә хитай ата-анилардин туғулған оқуғучиларға номур қетип берилип, хитай тилидики уйғур оқуғучиларниң номури қисқартилған.

Хәвәрдә, бу хил оқуғучиларға 15 номур қетип берилгәнлики билдүрүлгән. Мәзкур бәлгилимә уйғур районида уйғурлар билән хитайларниң никаһлиниши кәң көләмлик тәшвиқ қилиниватқан мәзгилдә чиқирилған. Йеқинда райондики һәр қайси наһийәләр өз алдиға уйғур қизлири билән никаһланған хитай әркәклириниң өй, хизмәт, иҗтимаий параванлиқ, давалиниш, маарип қатарлиқ җәһәтләрдә зор имтиязлардин бәһримән болидиғанлиқи һәққидә йәрлик бәлгилимиләрни чиқарғаниди. Лекин кишилик һоқуқ тәшкилатлириниң илгири сүрүшичә, даириләрниң уйғур қизлириниң хитай әркәкләр билән никаһлинишини илгирилитишидә уйғурларға қарита қаттиқ васитиләрму тәң ишқа селинмақтикән. Бу һәқтики бәзи учурларда, қизини хитай әркәклиригә бәрмигән ата-аниларниң лагерға әкитилиш билән тәһдит селинғанлиқи илгири сүрүлгәниди. Фирансийә агентлиқиниң хәвиридә тәкитлинишичә, чәтәллик мутәхәссисләр хитайниң номур қошуп бериш түзүмини униң ассимилятсийә сияситиниң бир қисми, дәп тәһлил қилишмақта икән. Бу тоғрисида австралийә ла троп университетиниң профессори җеймис лейболд: «номур қошуп бериш сиясити хитайларға ят болған һәрқандақ шәкилдики идийә вә хаһишларни хитайлаштурушни ишқа ашурушниң бир қисмидур» дегән.

Пикирләр (0)
Share
Толуқ бәт