«Һөкүмәтниң чақириқиға аваз қошуп хитай билән той қилидиған 100 уйғур келин» елани зор инкас қозғиди

Мухбиримиз ирадә
2020-07-23
Елхәт
Пикир
Share
Принт

Хитай һөкүмитиниң уйғур қизлирини хитай әрлиригә ятлиқ қилишни дөләт сиясити сүпитидә иҗра қилиниватқанлиқи ашкариланди.

Йеқинда хитайниң иҗтимаий таратқулирида тарқитилған уйғурчә видийолуқ еланда хитай әрлири билән тойлишидиған 100 нәпәр уйғур қизиға еһтияҗ барлиқи очуқ-ашкара елан қилинған.

Мәлум бир хитай әр билән уйғур қизниң той мәрикисиниң син көрүнүши билән тәйярланған бу еланда «партийә вә һөкүмәтниң бизгә гүзәл турмуш яритип бәргинигә рәһмәт. Һөкүмәтниң чақириқиға аваз қошуп, уйғурлар билән хәнзоларниң той қилишини илгири сүрүш үчүн 100 нәпәр келинчәккә җиддий еһтияҗ бар,» дейилгән.

Бу еланда йәнә қизиққучиларниң дәрһал алақә қилиши, ача-сиңил вә достлириға бу еланни дәрһал йәткүзүп қоюши тәвсийә қилинған һәмдә алақилишиш телефон номури қоюп қоюлған. Иҗтимаий таратқуларда бу телефон номуриниң қәшқәргә аит номурлуқи алға сүрүлмәктә.

Йеқинқи бир қанчә йилдин буян хитай һөкүмәт ахбаратлирида вә башқа иҗтимаий таратқуларда хитайлар билән уйғурларниң тойлишиши һәққидики хәвәрлири һәм шундақла хитай өлкилиридики хитай әрлирини уйғур елигә келип маканлишишқа вә бу йәрдә уйғур қиз-аяллири билән өйлинишкә чақиридиған тәшвиқатлар көрүнәрлик дәриҗидә көпәйгән иди. Буниң уйғур елидә лагер түзүми йолға қоюлуп, уйғур әрлирини асас қилған милйонлиған кишиниң лагерларға тутулуши билән мас қәдәмдә оттуриға чиқиши чәтәлләрдики уйғур җамаити һәм шундақла уйғурларни тәтқиқ қиливатқан көзәткүчиләрниң бирдәк диққитини қозғиған.

Америкалиқ антрополог дәррин байлир бу һәқтә елан қилған бир мақалисидә уйғур қизлирини хитай әрлиригә ятлиқ болушқа мәҗбурлаватқан сиясәт вә җәмийәт амиллирини анализ қилған. У мақалисидә «хитай һөкүмити уйғур елидә мәхсус уйғур аяллирини нишан алған җинсийәт сиясити йүргүзмәктә, тарихта тунҗи қетим уйғур аяллири дөләт аппаратлириниң җинсий нишаниға айланди,» дәп көрсәткән иди.

Хитай иҗтимаий таратқулирида ашкара болған бу елан чәтәлләрдики уйғур җамаитиниң күчлүк наразилиқини қозғиди.

Пикирләр (0)
Share
Толуқ бәт