"Hökümetning chaqiriqigha awaz qoshup xitay bilen toy qilidighan 100 Uyghur kélin" élani zor inkas qozghidi

Muxbirimiz irade
2020-07-23
Élxet
Pikir
Share
Print

Xitay hökümitining Uyghur qizlirini xitay erlirige yatliq qilishni dölet siyasiti süpitide ijra qiliniwatqanliqi ashkarilandi.

Yéqinda xitayning ijtima'iy taratqulirida tarqitilghan Uyghurche widiyoluq élanda xitay erliri bilen toylishidighan 100 neper Uyghur qizigha éhtiyaj barliqi ochuq-ashkara élan qilin'ghan.

Melum bir xitay er bilen Uyghur qizning toy merikisining sin körünüshi bilen teyyarlan'ghan bu élanda "Partiye we hökümetning bizge güzel turmush yaritip berginige rehmet. Hökümetning chaqiriqigha awaz qoshup, Uyghurlar bilen xenzolarning toy qilishini ilgiri sürüsh üchün 100 neper kélinchekke jiddiy éhtiyaj bar," déyilgen.

Bu élanda yene qiziqquchilarning derhal alaqe qilishi, acha-singil we dostlirigha bu élanni derhal yetküzüp qoyushi tewsiye qilin'ghan hemde alaqilishish téléfon nomuri qoyup qoyulghan. Ijtima'iy taratqularda bu téléfon nomurining qeshqerge a'it nomurluqi algha sürülmekte.

Yéqinqi bir qanche yildin buyan xitay hökümet axbaratlirida we bashqa ijtima'iy taratqularda xitaylar bilen Uyghurlarning toylishishi heqqidiki xewerliri hem shundaqla xitay ölkiliridiki xitay erlirini Uyghur élige kélip makanlishishqa we bu yerde Uyghur qiz-ayalliri bilen öylinishke chaqiridighan teshwiqatlar körünerlik derijide köpeygen idi. Buning Uyghur élide lagér tüzümi yolgha qoyulup, Uyghur erlirini asas qilghan milyonlighan kishining lagérlargha tutulushi bilen mas qedemde otturigha chiqishi chet'ellerdiki Uyghur jama'iti hem shundaqla Uyghurlarni tetqiq qiliwatqan közetküchilerning birdek diqqitini qozghighan.

Amérikaliq antropolog derrin baylir bu heqte élan qilghan bir maqaliside Uyghur qizlirini xitay erlirige yatliq bolushqa mejburlawatqan siyaset we jem'iyet amillirini analiz qilghan. U maqaliside "Xitay hökümiti Uyghur élide mexsus Uyghur ayallirini nishan alghan jinsiyet siyasiti yürgüzmekte, tarixta tunji qétim Uyghur ayalliri dölet apparatlirining jinsiy nishanigha aylandi," dep körsetken idi.

Xitay ijtima'iy taratqulirida ashkara bolghan bu élan chet'ellerdiki Uyghur jama'itining küchlük naraziliqini qozghidi.

Toluq bet