Derrin baylérning "Uyghurlarning milletler ara toylashqandin kéyinki muhebbiti" namliq maqalisi diqqet qozghimaqta

Muxbirimiz sada
2019-08-07
Élxet
Pikir
Share
Print

Uyghur diyaridiki Uyghur qiz-ayallirining xitay erlerge mejburiy yatliq qiliniwatqanliqi heqqidiki xewerler izchil otturigha chiqip kelmekte. Amérikaliq antropolog derrin baylér yéqinda élan qilghan "Uyghurlarning milletler ara toylashqandin kéyinki muhebbiti" namliq maqalisidimu mushu mesililer nuqtiliq mulahize qilin'ghan.

Derrin baylér maqalisining bashlanmisida öz-ara muhebbetliship toy qilishqa pütüshken bir jüp Uyghur qiz-yigitning hékayisi tonushturulghan. Uningda déyilishiche, Uyghur yigit chet'elge oqushqa chiqip kétishi bilen qizning ata-anisi uni biz xitay erge yatliq qilishqa mejbur bolup qalghan, shu sewebtin bu bir jüp Uyghur qiz-yigitning muhebbiti xirisqa duch kelgen.

Derrin baylér maqaliside yene tarixtin buyan Uyghur we xitaylarning ariliship toy qilish nisbitining intayin töwen bolup kelgenlikini, halbuki 2018-yilidin kéyin bu nisbetning körünerlik derijide ashqanliqini bayan qilghan. U yene özini "Bingtu'enning pida'iy jengchisi" dep atiwalghan bir xitayning tüzüp chiqqan "Uyghur qizlirining könglini qandaq utush kérek" namliq atalmish "Nikah qollanmisi" heqqide toxtalghan. Buningda Uyghur qiz-ayalliridin qandaq obéykt tallash we ular bilen bolghan muhebbet jeryanini "Qandaq rawajlandurush" qatarliq nuqtilarda tepsiliy chüshenche bérilgen iken.

Derrin baylér bayanlirida yene nöwette Uyghur diyarida yashawatqan bir Uyghur qizning melumatlirinimu tilgha alghan bolup, uningda milletler ara ara toylishishning nöwette Uyghur diyaridiki eng jiddiy bir mesilige aylan'ghanliqini, nurghun kishilerning özining "Qoshmaq tughqan" i bilen toy qilishqa zorliniwatqanliqini sözlep ötken.

Derrin baylér maqalisining axirida muhebbet kechmishliri ongushsizliqqa uchrighan bir jüp Uyghur qiz-yigitining hékayisini qayta tilgha élip, pütkül Uyghur jem'iyitining kelgüsidiki ijtima'iy yüzlinishige so'al qoyidu.

Toluq bet