Tramp hökümiti Uyghurlarni xorlawatqan xitay emeldarlirigha émbargo yürgüzüsh toghrisida küchlük bésimgha duch kelmekte
Amérika tashqi ishlar ministiri mayk pompé'o yekshenbe küni amérikadiki bir téléwiziye qanilining ziyaritini qobul qilghanda hökümetning néme üchün xitayning Uyghurlarni lagérlargha qamap, ularni xorlishigha qarshi émbargo qoymaydighanliqi heqqidiki so'aligha duch kelgen.
-
Muxbirimiz erkin
2019-05-06 -
-
-
Amérika tashqi ishlar ministiri mayk pompé'o yekshenbe küni amérikadiki bir téléwiziye qanilining ziyaritini qobul qilghanda hökümetning néme üchün xitayning Uyghurlarni lagérlargha qamap, ularni xorlishigha qarshi émbargo qoymaydighanliqi heqqidiki so'aligha duch kelgen.
Bu so'al pompé'o yekshenbe küni CBS téléwiziye qanilining “Millet bilen yüzlishish” namliq mexsus programmisining ziyaritini qobul qilghanda otturigha qoyulghan. Pompé'o, özining kishilik hoquq mesilisini xitay tashqi ishlar ministiri wang yi we bashqilar bilen ötküzgen köp qétimliq söhbetliride otturigha qoyup kelgenlikini bildürgen bolsimu, lékin u hökümetning küntertipide jazalash pilani bar-yoqluqigha jawab bermigen. U yene riyasetchi margérét brenenning “Néme üchün amérika tashqi ishlar ministirliqi bilen dölet mudapi'e ministirliqi tutqunlarning sani we lagérlarni perqliq teripleydu”, dégen so'aligha bu mesilide ixtilap barliqini ret qilghan. U “Bir milyondek kishining qayta-terbiyelesh lagérlirida tutup turuluwatqanliqi” ni bildürüp, hökümetning “Chékidin ashqan bu kishilik hoquq depsendichilikini her xil términlar bilen ipadilep, uni qayta-qayta eyiblep kéliwatqanliqi” ni tekitligen.
Mayk pompé'o CBS téléwiziyeside bu sözlerni qilishtin ikki kün awwal amérika dölet mudapi'e ministirliqining yardemchi ministiri rendi shraywér, Uyghur rayonidiki lagérlarning “Jaza lagérliri” ikenliki, uningda 3 milyondek Uyghur we bashqa musulman milletlerning tutup turuluwatqanliqini bildürgen idi. Mayk pompé'o yuqiriqi sözlerni tramp hökümitining magnitiskiy qanunini ijra qilip, xitay emeldarlirigha émbargo qoyushta kéchikishi amérika dölet mejlisidiki bezi awam we kéngesh palata ezalirini bi'aram qiliwatqan bir mezgilde qilghan. Tashqi ishlar ministiri pompé'o ötken hepte washin'gtondiki bir soda teshkilatida nutuq sözligende xitayning lagérlirini tenqidlep, bu lagérlarning “1930-Yillarni eslitidighanliqi” ni bildürgen idi.