Трамп һөкүмити уйғурларни хорлаватқан хитай әмәлдарлириға ембарго йүргүзүш тоғрисида күчлүк бесимға дуч кәлмәктә

Мухбиримиз әркин
2019-05-06
Share

Америка ташқи ишлар министири майк помпео йәкшәнбә күни америкадики бир телевизийә қанилиниң зияритини қобул қилғанда һөкүмәтниң немә үчүн хитайниң уйғурларни лагерларға қамап, уларни хорлишиға қарши ембарго қоймайдиғанлиқи һәққидики соалиға дуч кәлгән.

Бу соал помпео йәкшәнбә күни CBS телевизийә қанилиниң “милләт билән йүзлишиш” намлиқ мәхсус программисиниң зияритини қобул қилғанда оттуриға қоюлған. Помпео, өзиниң кишилик һоқуқ мәсилисини хитай ташқи ишлар министири ваң йи вә башқилар билән өткүзгән көп қетимлиқ сөһбәтлиридә оттуриға қоюп кәлгәнликини билдүргән болсиму, лекин у һөкүмәтниң күнтәртипидә җазалаш пилани бар-йоқлуқиға җаваб бәрмигән. У йәнә риясәтчи маргерет брәнәнниң “немә үчүн америка ташқи ишлар министирлиқи билән дөләт мудапиә министирлиқи тутқунларниң сани вә лагерларни пәрқлиқ тәрипләйду”, дегән соалиға бу мәсилидә ихтилап барлиқини рәт қилған. У “бир милйондәк кишиниң қайта-тәрбийәләш лагерлирида тутуп турулуватқанлиқи” ни билдүрүп, һөкүмәтниң “чекидин ашқан бу кишилик һоқуқ дәпсәндичиликини һәр хил терминлар билән ипадиләп, уни қайта-қайта әйибләп келиватқанлиқи” ни тәкитлигән.

Майк помпео CBS телевизийәсидә бу сөзләрни қилиштин икки күн аввал америка дөләт мудапиә министирлиқиниң ярдәмчи министири рәнди шрайвер, уйғур районидики лагерларниң “җаза лагерлири” икәнлики, униңда 3 милйондәк уйғур вә башқа мусулман милләтләрниң тутуп турулуватқанлиқини билдүргән иди. Майк помпео юқириқи сөзләрни трамп һөкүмитиниң магнитиский қанунини иҗра қилип, хитай әмәлдарлириға ембарго қоюшта кечикиши америка дөләт мәҗлисидики бәзи авам вә кеңәш палата әзалирини биарам қиливатқан бир мәзгилдә қилған. Ташқи ишлар министири помпео өткән һәптә вашингтондики бир сода тәшкилатида нутуқ сөзлигәндә хитайниң лагерлирини тәнқидләп, бу лагерларниң “1930‏-йилларни әслитидиғанлиқи” ни билдүргән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт