Президент трамп: “бизниң әркинликимиз қан, тәр вә америка қәһриманлириниң бәдилигә кәлгән”

Америка президенти доналд трап 4‏-июл америка мустәқиллиқ күнидә тәбрик сөзи елан қилип, америкилиқларни америкиниң әркинликиниң қан-тәр вә қәһриманларниң бәдилигә кәлгәнликини унтуп қалмаслиққа чақирди.

Америка хәлқи 4‏-июл күни һәр хил паалийәтләрни өткүзүп, америка мустәқиллиқиниң 242 йиллиқини тәбриклиди. Америкидики уйғурлар мустәқиллиқ байримини “америка уйғур лоңқиси” ни талишиш мусабиқиси билән күтүвалди. Вирҗинийә штатида өткүзүлидиған 4 күнлүк мусабиқиниң ечилиш мурасими 4‏-июл күни өткүзүлди.

Президент трамп тәбрик сөзидә өзи вә аяли миләния трампниң 4‏-июл мустәқиллиқ күнини тәбрикләштәк бир шәрәпкә наил болғанлиқини тәкитләп, “буниңдин 242 йил аввалқи бүгүнки күндә америка хәлқиниң 56 нәпәр җәсур вәкили бизниң мустәқиллиқ хитапнамисини мақуллап, дуняға америкиниң әркинлик вә мустәқиллиқ истәйдиғанлиқини җакарлиған иди,” дәп көрсәтти. 1776‏-Йили дәл 4‏-июл күни америкиниң атлантик окян қирғиқидики 13 мустәмликә райониниң вәкиллири филаделфийә шәһиридә йиғин чақирип, америкиниң мустәқиллиқ хитапнамисини мақуллиған.

Президент трамп тәбрик сөзидә йәнә мундақ дегән: “генерал вашингтон вә униң җәсур вәтәнпәрвәр армийәси биританийә билән узунға созулған кәскин уруш қилиш арқилиқ ғәлибини қолға кәлтүрүп америкиниң әркинликини қолға кәлтүрди. Достлиримиз вә аилимиз билән 4‏-июл мустәқиллиқ байримини тәбриклигәндә бизниң әркинликимизниң қан-тәр вә америка қәһриманлириниң бәдилигә кәлгәнликини һәргиз унтуп қалмаслиқимиз керәк.”

Бүгүн йәнә пайтәхт вашингтон шәһиридә бәзи мәнилик паалийәтләр өткүзүлди. Америка дөләтлик архип идариси бинасиниң алдида америка “мустәқиллиқ хитабнамиси” оқуп өтүлди.