Prézidént tramp: "Bizning erkinlikimiz qan, ter we amérika qehrimanlirining bedilige kelgen"

Muxbirimiz erkin
2018-07-04
Élxet
Pikir
Share
Print

Amérika prézidénti donald trap 4‏-iyul amérika musteqilliq künide tebrik sözi élan qilip, amérikiliqlarni amérikining erkinlikining qan-ter we qehrimanlarning bedilige kelgenlikini untup qalmasliqqa chaqirdi.

Amérika xelqi 4‏-iyul küni her xil pa'aliyetlerni ötküzüp, amérika musteqilliqining 242 yilliqini tebriklidi. Amérikidiki Uyghurlar musteqilliq bayrimini "Amérika Uyghur longqisi" ni talishish musabiqisi bilen kütüwaldi. Wirjiniye shtatida ötküzülidighan 4 künlük musabiqining échilish murasimi 4‏-iyul küni ötküzüldi.

Prézidént tramp tebrik sözide özi we ayali mileniya trampning 4‏-iyul musteqilliq künini tebrikleshtek bir sherepke na'il bolghanliqini tekitlep, "Buningdin 242 yil awwalqi bügünki künde amérika xelqining 56 neper jesur wekili bizning musteqilliq xitapnamisini maqullap, dunyagha amérikining erkinlik we musteqilliq isteydighanliqini jakarlighan idi," dep körsetti. 1776‏-Yili del 4‏-iyul küni amérikining atlantik okyan qirghiqidiki 13 mustemlike rayonining wekilliri filadélfiye shehiride yighin chaqirip, amérikining musteqilliq xitapnamisini maqullighan.

Prézidént tramp tebrik sözide yene mundaq dégen: "Général washin'gton we uning jesur wetenperwer armiyesi biritaniye bilen uzun'gha sozulghan keskin urush qilish arqiliq ghelibini qolgha keltürüp amérikining erkinlikini qolgha keltürdi. Dostlirimiz we a'ilimiz bilen 4‏-iyul musteqilliq bayrimini tebrikligende bizning erkinlikimizning qan-ter we amérika qehrimanlirining bedilige kelgenlikini hergiz untup qalmasliqimiz kérek."

Bügün yene paytext washin'gton shehiride bezi menilik pa'aliyetler ötküzüldi. Amérika döletlik arxip idarisi binasining aldida amérika "Musteqilliq xitabnamisi" oqup ötüldi.

Toluq bet