Pirézidént donald trampning yéngi hökümet teshkillesh qedimi xitaygha selbiy tesir körsitishke bashlighan

Amérika pirézidénti bolup qayta saylan'ghan donald tramp, xitayni izchil tenqidlep kéliwatqan ikki siyasetchini yéngidin teshkilleydighan hökümitining muhim orunlirigha teyinlimekchi boluwatqan bolup, bu ehwal ikki döletning kelgüsi bir nechche yilda munasiwetlirining téximu yamanlishidighanliqidin bésharet bermekte iken.

“Blombérg xewerliri tori” ning 12-noyabir bergen xewiride éytilishiche, pirézidént donald tramp amérika kéngesh palata ezasi marko robiyoni amérikaning tashqi ishlar ministiri, awam palata ezasi mayk waltiz (Mike Waltz) ni amérika dölet xewpsizliki meslihetchisi, awam palata ezasi elis stéfanik (Elise Stefanik) ni amérikaning b d t da turushluq bash elchisi qilip teyinlimekchi bolghan. Ularning hemmisi xitay kompartiyesini xeterlik küch dep bilidighan we xitay bilen muresse qilmaydighan siyasetchiler iken.

Pirézidént donald tramp saylamning aldida xitay malliridin alidighan tamozhna béjini 60 pirsentke chiqiridighanliqini élan qilghanidi. Uning pirézidént bolup saylan'ghandin kéyinla kommunist xitayni tehdit dep bilidighan siyasetchilerni hökghümetning muhim orunlirigha teyinlimekchi bolushi, uning xitaygha tutidighan keskin siyasitining yönilishini körsitip bergen.

Iqtisadshunaslarning mölcherlishiche, bu ehwal dunyadiki eng chong iqtisadiy gewdiler bolghan amérika bilen xitayning tashqi soda munasiwitini téximu nacharlashturup, dunyaning kelgüsi iqtisadi we siyasitide zor dawalghushlarni meydan'gha keltüridiken. Emeliyette bu dawalghush hazirdin bashlap körülüshke bashlighan bolup, 12-noyabir küni xongkong baziridiki xitay pay chekliri shiddet bilen chüshüp ketken, xitay shirketlirining pay cheklirining chüshüsh nisbiti 3 pirsenttin éship ketken.

Xewerde éytilishiche, peqet jumhuriyetchilerla emes, belki téslaning xojayini, dunyadiki birinchi bay élon mask qatarliq karxanichilarmu pirézidént donald trampni qollawatqan bolup, uning xitaydiki tésla zawuti we milyard dollarliq soda menpe'eti kelgüside qandaq xirislargha duch kélidu, donald tramp buni qandaq bir terep qilidu, téxi éniq emes iken. Yene kélip, élan mask xitay bash ministiri li chyangning qollishigha érishken karxanichi bolup, bumu amérika bilen xitay otturisidiki hoquq-soda munasiwitini murekkepleshtürüwetken. Xitay kompartiyesining bash sékrétari shi jinping donald trampni tebrikligende, ikki döletning payda tapsa teng tapidighan, ziyan tartsa teng tartidighan döletler ikenlikini alahide eskertken bolup, pirézidént trampning bu müshkülatni qandaq siyasiy taktika we paraset bilen hel qilidighanliqi diqqet nuqtisi kelmekte.