Трампниң алекс воңни муавин дөләт бихәтәрлик мәслиһәтчиси қилип таллиши хитайға нисбәтән күчлүк сигнал дәп қаралмақта
2024.11.25
“һәптилик хәвәрләр” ториниң хәвиригә қариғанда қайтидин америка пирезидентлиқиға сайланған доналд трамп 11-айниң 22-күни алекс воңни муавин дөләт хәвпсизлики мәслиһәтчиси қилип таллиғанлиқини җакарлиған. У, буниң алдида майк валтизни дөләт хәвпсизлики мәслиһәтчиси қилип тәйинлигәниди.
Доналд трампниң биринчи қетим пирезидентлиқ вәзиписини өтәш муддити мәзгилидә алекс воң (Alex Wong) американиң шимали корейә ишлирини беҗиридиған муавин алаһидә вәкили болуп, у трампниң шимали корейә рәһбири ким җоңун билән учришини тәшкилләшкә қатнашқаниди. Трамп алекс воңниң вәзипигә тәйинләнгәнликини җакарлиғанда мундақ дегән: “алекис вуң америка ташқи ишлар министирлиқиниң әркин вә очуқ һинди-тинч окян истратегийәсини йолға қоюш тиришчанлиқиға рәһбәрлик қилди”.
Алекс воң 2023-йили өктәбирдә вашингтондики худсон институти ақиллар амбири тәрипидин елан қилинған мақалисидә, у хитайни либерал хәлқара тәртипни суйиистемал қилип қудрәт тапқан дөләт дәп тәсвирлигән. Алекис воң мақалисидә йәнә мундақ дәп язған: “әң хәтәрлик йери шуки, хитайниң давамлиқ мәвҗут болуп туруши йәнә либерал хәлқара тәртипни суйиистемал қилишиға бағлиқ. Хитай компартийәси әқлий мүлүк һоқуқини оғрилаш, хәлқара сиясий ирадиләрни мәҗбурлаш вә қалаймиқан қилиш, хитай болмиған милләтләрни бастурушни өзиниң һакимийитини қанунлаштуруш үчүн қоллиниватиду”.
Доналд трампниң хитайға қарши қаттиқ қоллуқи билән тонулған марко рубийони америка ташқи ишлар министири, майк валтизни дөләт хәвпсизлик мәслиһәтчиси қилип тәйинлиши, униңдин кейин алекс воңни муавин дөләт хәвпсизлик мәслиһәтчиси қилип таллиши трамп һөкүмитиниң хитайға техиму қаттиқ муамилә қилидиғанлиқиниң күчлүк сигнали дәп қаралмақта.
Доктор андерис кор қатарлиқ сиясий анализчилар доналд трампниң хитайға қарши қаттиқ қоллуқи билән тонулған марко рубийони америка ташқи ишлар министири, майк валтизни дөләт хәвпсизлик мәслиһәтчиси вә алекс воңни муавин дөләт хәвпсизлики мәслиһәтчиси қилип таллиши хитайға берилгән күчлүк сигнал дәп қариған.