Jumhuriyetchiler partiyesining pirézidént namzati donald tramp saylamda ghelibe qildi

Amérikada 5-noyabir küni ötküzülgen pirézidéntliq saylimida jumhuriyetchiler partiyesining pirézidént namzati donald trampning utup chiqqanliqi jezmleshti.

Birleshme agéntliqning xewirige qarighanda, donald trampning amérika saylimining netijisige tesir körsitidighan hel qilghuch ishtatlarda üstünlükni igilishi bilen pirézidént bolup saylinip chiqishqa zörür bolghan 270 saylam béliti qolgha keltürülgen.

Amérikaning 45-nöwetlik pirézidénti bolghan, 2020-yilliq saylamdiki meghlubiyitidin kéyin qaytidin saylamgha qatniship ghelibe qilghan sabiq pirézidént donald tramp amérika tarixida yéngiliq yaratqan pirézidéntlarning biri bolup qaldi.

Donald trampning saylamdiki ghelibisi jezmlishishke bashlighan deslepki minutlarda, u filorida ishtatining gherbiy palmiliq sahilida söz qilip, saylighuchilargha rehmet éytqan. U saylamdiki ghelibisini amérika tarixidiki “Eng chong siyasiy heriket” dep atighan. U mundaq dégen: “Biz bir tarix yarattuq, mumkin emes dep qaralghan tosalghularni yengduq”.

Donald tramp, bu qétimliq saylam netijisining amérika tarixida yéngidin “Altun dewr” achidighanliqini tekitligen. U, amérikaliqlargha mundaq dep xitab qilghan:

“Men siz, a'ilingiz we kelgüsingiz üchün küresh qilimen. Siler üchün küresh qilishtin bir künmu toxtap qalmaymen. Axirqi nepisimgiche kürishimni dawamlashturimen. Men amérikani biz we bizning kelgüsi ewladlirimizgha layiq bolghan küchlük, bixeter we bayashat qilip chiqmighuche toxtimaymen!”

U yene mundaq dégen: “Bu heqiqeten amérikaning altun dewri bolidu. Mana bu bizde bolushqa tégishlik nerse. Bu bizge amérikani qaytidin büyük dölet qilip chiqish pursiti bergen amérikaliqlarning ghayet zor ghelibisi.”

Donald tramp amérika saylimida hel qilghuch rol oynaydighan shimaliy karolina, jorjiya, pénsilwaniye we wiskonsin shitatlirida ghelibe qilghan bolup, uning qollighuchilirining téxi bilet sanash dawam qiliwatqan arizona we mishigan qatarliq shitatlardimu aldida méngiwatqanliqi melum.

Jumhuriyetchiler partiyesi bu qétimliq amérika pirézidént saylimidila utup qalmastin, belki yene amérika kéngesh palatasidimu 52 orun'gha ériship, üstünlükni igiligen. Bu netijining tramp yéqin kelgüside aqsaraygha kirgendin kéyin uning zor siyasiy qararlarni élishi we ijra qilishini zor derijide asanlashturidighanliqi mölcherlenmekte.