Xitay, donald trampning ghelibisidin kéyinki inkasida “Amérika bilen hemkarlishish” arzusini tilgha alghan

Xitay tashqi ishlar ministirliqi sabiq pirézidént donald trampning yéngidin pirézidént bolup saylan'ghanliqigha inkas qayturup “Xitay, amérika bilen öz'ara hörmet asasida hemkarlishidu” dégen.

Roytérs agéntliqining xewirige qarighanda, xitay tashqi ishlar bayanatchisi mawning 6-noyabir künidiki axbarat élan qilish yighinidiki sözide mundaq dégen:

“Biz xitay-amérika munasiwitini öz'ara hörmet qilish, tinchliq ichide bille mewjut bolush we teng payda élishtek hemkarliq pirinsipi dep qaraymiz we shu boyiche ish körimiz.”

Mawning yene, muxbirlarning sabiq pirézidéntning wezipige qaytip kélishi ikki dölet munasiwitige qandaq tesir körsitidighanliqini sorighanda “Bizning amérikagha qaratqan siyasitimiz birdek” dep körsetken.

Amérika jumhuriyetchiler partiyesi namzati we sabiq pirézidént donald trampning saylamdiki ghelibisi jezmleshkendin kéyin, teywen pirézidénti lay chingdé ijtima'iy alaqe tori arqiliq trampni tebrikligen. U, amérika-teywen munasiwitining dawamliq halda “Rayon muqimliqining ul téshi” bolidighanliqigha ishinidighanliqini bildürgen.

En'gliye bash ministiri kéyir starmér bolsa “En'gliye amérikaning eng yéqin ittipaqdishi bolush süpiti bilen erkinlik, démokratiye we sodidiki ortaq qimmet qarishimizni qoghdash üchün mürini mürige tirep küresh qilidu” dégen.

Shimaliy atlantik ehdi teshkilati bash katipi mark rutté bolsa “Donald trampning rehberlikining ittipaqni mustehkemleshte achquchluq rol oynaydighanliqini” tekitligen we uning “Shimaliy atlantik ehdi teshkilati bilen hemkarliship tinchliqni ilgiri sürüshni ümid qilidighanliqini” bildürgen.

Yawropa ittipaqi komissiyoni re'isi ursula wonderléyinmu sözide “Amérika we yawropaning kona shériklerdin ikenlikini tekitlep “Atlantik okyandin halqighan kün tertipte hemkarlishish” arzusini tilgha alghan.