Pirézidént tramp xitay re'isi shi jinping bilen körüshüsh éhtimalliqini bildürdi

Amérika pirézidénti donald tramp xitay re'isi shi jinpingning amérikagha ziyaretke kélidighanliqini mölcherlewatqanliqini, uning bilen soda we tamozhna béji qatarliq mesililerde söhbetlishish kérek, dep qaraydighanliqini bildürgen.

“Roytérs agéntliqi” ning 20-féwraldiki xewiride éytilishiche, pirézidént donald tramp 2-ayning 19-küni muxbirlargha qilghan sözide, xitay re'isi shi jinpingning amérikagha ziyaretke kélishige ijabiy qaraydighanliqini, xitay bilen soda jehette kélishim tüzüsh éhtimalliqi barliqini bildürgen, emma ziyaretning konkrét waqtini démigen. Pirézidént tramp bilen shi jinpingning söhbetliship turushi yaki ziyaret arqiliq uchrishishi ikki döletning tamozhna béji mesilisidiki ixtilap we ziddiyetlirini yumshitishi mumkin dep qaralmaqta iken.

Xewerde déyilishiche, pirézidént tramp özining yene xitay bilen “Tik-tok” toghruluq söhbetlishiwatqanliqini, shundaqla “Tik-tok” ning amérikadiki mulazimitini amérika shirketlirige sétishini qolgha keltürüshke tirishiwatqanliqini bildürgen.

Melum bolushiche, shi jinping xitay rehbiri bolghandin buyan amérikani besh qétim ziyaret qilghan bolup, eng axirqi qétim 2023-yil 11-ayda sabiq amérika pirézidénti jow baydin bilen körüshüp, ikki terep armiyesi otturisidiki uchur-alaqini eslige keltürüsh we féntanilni cheklesh mesiliside kélishim hasil qilghan. Pirézidént tramp bolsa, 1-ayning 20-küni wezipige olturushtin ilgiri shi jinping bilen téléfonda körüshüp teywen mesilisi, soda we “Tik-tok” toghruluq söhbetleshken.

Xewerde körsitilishiche, yillardin buyan amérika-xitay munasiwiti teywen mesilisi, “Tik-tok” ni cheklesh, kishilik hoquqni qoghdash, kowid wirusining tarqilish menbesini sürüshtürüsh jehettiki ixtilaplar sewebidin jiddiyliship mangghan. Arqidinla uninggha tamozhna béji we soda jéngi qoshulghan. Omumen éytqanda, xitayning amérikagha asasliq tehdit ikenlikidek bu ré'alliq amérikadiki siyasetchilerning ortaq tonushigha aylan'ghan bolup, bu öz nöwitide pirézidént trampning xitay üstidin qandaq ghalip kélish parasitige baghliq mesilige aylan'ghan.