Ваң җүнҗеңниң тумшуқ сәпиридә хитай һөкүмитиниң бир қисим йеңи ғәрәзлири ашкара болди

 Хитай башқуришидики “биңтуән тори” ниң 17-авғусттики хәвиридә ейтилишичә, уйғур аптоном районлуқ парткомниң муавин секретари, биңтуән парткоминиң секретари вә сиясий комиссари ваң җүнҗең тумшуқ шәһридә хизмәт тәкшүришидә болған. Бу җәрянда у хитай рәиси ши җинпиңниң “1-июл нутуқи” ниң роһини әстайидил өгиниш билән биргә хитай мәркизий һөкүмитиниң биңтуән хизмити һәққидики йолйоруқлириниң толуқ әмилишиши лазимлиқини алаһидә тәкитлигән. 

Хәвәрдә ейтилишичә, ваң җүнҗең “биз буниңдин кейинки хизмитимиздә биңтуәнниң унверсал күчини ашуришимиз, биңтуәнни актип вә салмақ қәдәмләр билән җәнубқа кеңәйтишимиз, шуниң билән биргә биңтуәнниң йәрлик билән сиңишишини паал алға сүришимиз лазим” дегән. У йәнә биңтуәнниң муқимлиқ вә терорлуққа қарши туруштики ролини техиму зор күч билән җари қилдуруш лазимлиқини, бу арқилиқ пүткүл районниң муқимлиқини вә омумий вәзийитиниң турақлиқ болушини капаләткә игә қилишни тәкитлигән. 

Ваң җүнҗеңниң бу қетимқи хизмәт зияритидә алаһидә тәкитлигән “биңтуәнләрни җәнупқа кеңәйтиш вә йәрлик билән сиңишиш” һәққидики сөзлирини бәзи анализчилар “хитай һөкүмитиниң узун йиллардин буян давам қилип кәлгән биңтуән сияситиниң йеңи тәрәққиятидин бишарәт” деди. Америкадики мустәқил анализчи илшат һәсән бу һәқтә тохтилип: “хитай һөкүмити шәрқий түркистанда қәғәз йүзидики аптономийәни қуруп қоюп уйғурларни алдап кәлгән. Шуниң билән бир вақитта улар йәнә биңтуән арқилиқ бу ‛қәғәз йүзидики аптономийә‚ ни чәкләп кәлгән. Әмдиликтә ашкара һалда бу ‛сахта аптономийә‚ ни йоқ қилишқа йүзләнмәктә,” деди.