Wang jünjéngning tumshuq sepiride xitay hökümitining bir qisim yéngi gherezliri ashkara boldi

• Muxbirimiz eziz
  2021-08-17

 Xitay bashqurishidiki “Bingtu'en tori” ning 17-awghusttiki xewiride éytilishiche, Uyghur aptonom rayonluq partkomning mu'awin sékrétari, bingtu'en partkomining sékrétari we siyasiy komissari wang jünjéng tumshuq shehride xizmet tekshürishide bolghan. Bu jeryanda u xitay re'isi shi jinpingning “1-Iyul nutuqi” ning rohini estayidil öginish bilen birge xitay merkiziy hökümitining bingtu'en xizmiti heqqidiki yolyoruqlirining toluq emilishishi lazimliqini alahide tekitligen. 

Xewerde éytilishiche, wang jünjéng “Biz buningdin kéyinki xizmitimizde bingtu'enning unwérsal küchini ashurishimiz, bingtu'enni aktip we salmaq qedemler bilen jenubqa kéngeytishimiz, shuning bilen birge bingtu'enning yerlik bilen singishishini pa'al algha sürishimiz lazim” dégen. U yene bingtu'enning muqimliq we térorluqqa qarshi turushtiki rolini téximu zor küch bilen jari qildurush lazimliqini, bu arqiliq pütkül rayonning muqimliqini we omumiy weziyitining turaqliq bolushini kapaletke ige qilishni tekitligen. 

Wang jünjéngning bu qétimqi xizmet ziyaritide alahide tekitligen “Bingtu'enlerni jenupqa kéngeytish we yerlik bilen singishish” heqqidiki sözlirini bezi analizchilar “Xitay hökümitining uzun yillardin buyan dawam qilip kelgen bingtu'en siyasitining yéngi tereqqiyatidin bisharet” dédi. Amérikadiki musteqil analizchi ilshat hesen bu heqte toxtilip: “Xitay hökümiti sherqiy türkistanda qeghez yüzidiki aptonomiyeni qurup qoyup Uyghurlarni aldap kelgen. Shuning bilen bir waqitta ular yene bingtu'en arqiliq bu ‛qeghez yüzidiki aptonomiye‚ ni cheklep kelgen. Emdilikte ashkara halda bu ‛saxta aptonomiye‚ ni yoq qilishqa yüzlenmekte,” dédi.