Nuri türkelning anisi amérika hökümitining yardimide washin'gton'gha yétip keldi

“Nyu-york waqti géziti” ning 2-dékabirdiki xewiride éytilishiche, amérika xelq'ara diniy erkinlik komitétining sabiq re'isi, adwokat we kishilik hoquq pa'aliyetchisi nuri türkelning anisi xitaydin yolgha chiqip, amérika tewesidiki perzentliri bilen jem bolghan.

Xewerde déyilishiche, bir hepte burun xitay saqchiliri nuri türkelning qeshqerdiki a'ilisige bérip, anisi ayshem mamut xanimni yük-taqilirini yighishturup, saqchilar bilen bille méngishni éytqan. Ayshem mamut xanim xuddi bashqa Uyghurlargha oxshash lagérgha yaki türmige élip kétilip, nechche yillar iz-déreksiz yoq qiliwétilish éhtimalinimu xiyal qilghan. Kütülmigende u töt kündin kéyin amérikagha kélip, 20 yildin buyan körüshelmigen ikki oghli we newriliri bilen körüshken.

Aldinqi hepte amérika bilen xitay hökümiti öz'ara mehbus almashturghan bolup, xitay hökümiti üch neper amérika puqrasini qoyup bergen. Ikki döletning kélishimige asasen, xitay hökümiti yene bu tutqunlargha qoshup ayshem mamut xanim we bashqa ikki Uyghur (ularning biri amérika puqrasi) ning xitaydin ayrilip, amérikagha kélishige qoshulghan. Bu, xitay hökümitining amérika hökümitining telipige bina'en, 2005-yil rabiye qadirni qoyup bergendin kéyin, yene bir qétim Uyghurlarning xitaydin ayrilip amérikagha kélishige yol qoyushi hésablinidiken.

Xewerde éytilishiche, Uyghur kishilik hoquq pa'aliyetchilirining wetendiki a'ile ezaliri bilen körüshelmesliki uzundin buyan éghir mesile bolup qalghan bolup, amérika hökümiti bu mesilige izchil köngül bölüp kelgen. Sabiq pirézidént donald tramp, jümlidin pirézidént jow baydin xitay re'isi shi jinping bilen körüshkende nuri türkelning anisini amérikigha yolgha sélip qoyushni ikki qétim tilgha alghan.

 Xewerde, nuri türkelning ata-anisi bilen jem bolush üchün körsetken tirishchanliqliri we anisining bu qétim xitaydin qutulup, amérikagha kélelishidiki arqa körünüshler bayan qilin'ghan bolup, her tereplime diplomatlar, hökümet emeldarliri we siyasyonlarning üzlüksiz tirishchanliqi netijiside axiri bu qétimliq jem bolush emelge ashqan.