Uyghurlar amérikada ötküzülgen “Türk féstiwali” gha qatniship, Uyghur irqiy qirghinchiliqigha diqqet tartqan

15-Öktebir yekshenbe küni amérika paytexti washin'gtonda yilda bir qétim ötküzülidighan “Türk féstiwali” namliq medeniyet köriki ötküzüldi. Washin'gton alahide rayonining aqsaray jaylashqan pénsilwaniye kochisida bolup ötken mezkur medeniyet körikige amérika Uyghur birleshmisimu qatnashqan bolup, ular körekte ‍Uyghurlarning özige xas medeniyitini tonushturush bilen birge, nöwette dawamlishiwatqan Uyghur irqiy qirghinchiliqigha diqqet tartti.

15-Öktebir etigen 11din chüshtin kéyin 6 ghiche dawamlashqan bu féstiwalgha nechche minglighan tamashibin we ziyaretchi ishtirak qilghan. Mezkur pa'aliyetni qollighuchi orunlar qataridin orun alghan amérika Uyghur birleshmisi, mezkur féswtiwalda mexsus jay qurup, Uyghurlarning kiyim-kéchek, chalghu eswabliri we Uyghurche kitablarni körgezme qilghan, ular yene ziyaretchilerge “Irqiy qirghinchiliq toxtitilsun” dégen sho'ar yézilghan maykalarni satqan.

Amérika Uyghur birleshmisining re'isi elfidar éltebir xanimning tonushturushiche, ular ziyaretchilerge yene nöwette Uyghur medeniyitining xitay hökümiti teripidin mislisiz yoqitishqa uchrawatqanliqi, Uyghurlarning her xil yollar bilen öz medeniyitini qoghdap qélish üchün küresh qiliwatqanliqini tonushturup chiqqan. Ular yene xitay hökümitining Uyghurlargha qaratqan irqiy qirghinchiliqining hazirmu dawamlishiwatqanliqini chüshendürgen, shundaqla ziyaretchilerni bu qirghinchiliqni toxtitish üchün qolidin kélidighan yardemlerni ayimasliqqa chaqirghan.

Féstiwal jeryanida türkiyening washin'gtonda turushluq bash elchisi murat özjan ependi alayiten Uyghur supisigha kélip, Uyghurlardin hal sorighan. Melum bolushiche, féstiwal jeryanida yene washin'gtondiki “Dolan réstorani” Uyghur tamaqlirini bazargha sélip, Uyghur ta'am medeniyitinimu namayan qilghan.

Bu amérika Uyghur jem'iyitining tunji qétim “Türk féstiwali” gha qatnishishi bolup hésablinidu. Türk medeniyiti we tarixini amérikagha tonushturushni meqset qilghan bu féstiwal her yili 10-ayda washin'gtondiki “Amérika türk jem'iyiti” ning orunlashturushida ötküzülüp kelmekte.