Türkiye herbiy aliy sot mehkimisini emeldin qalduridu

Roytérs agéntliqining xewirige qarighanda, türkiye hökümiti asasiy qanundiki bezi maddilarni özgertip herbiy aliy sotni bikar qilidighanliqini, bu arqiliq xelqning armiyeni we sot sistémisini téximu yaxshi nazaret qilishigha asanchiliq tughdurup bermekchi bolghanliqini jakarlighan.

Türkiye adalet komitétining re'isi exmet iyimaya roytérs agéntliqining muxbirigha qilghan sözide “Edliye sistémisidiki rohi gülenchilerge sétilghanlarni tazilash hazirqi eng muhim tedbir. Emdi herbiy aliy sot mehkimisi we herbiy idare soti birdek emeldin qaldurulidu” dégen.

Melum bolushiche, herbiy sot mehkimiliri eskerlerni sotlaydighan organ bolup, herbiy aliy sot mushu eskerlerdin naraziliq erzi sun'ghanlarning iltimasini qarap chiqishqa mes'ul iken.

15 - Iyul meghlubiyet bilen axirlashqan herbiy özgirishke urunush herikitidin kéyin, türkiye hökümiti 50 mingdin artuq hökümet xadimi we oqutquchilarni xizmettin toxtatqandin sirt 1700 neperge yéqin sotchini qolgha alghan idi.

Amérikidiki kishilik hoquq közitish teshkilati bu sotchilarning adil sotlinishidin endishe qilidighanliqini we bularning adil sotlinishni ümid qilidighanliqini bildürgen.