Türkiye qazaqistanni mezkur dölettiki "Gülenchiler" ning mektepliri heqqide agahlandurghan

Muxbirimiz jüme
2016-07-30
Share

Türkiyening qazaqistandiki bash elchisi qazaqistanni mezkur dölette échilghan"Gülenchiler" ning mektepliri heqqide agahlandurghan. Uning bu agahlandurushi türkiye tashqi ishlar ministiri mewlut chawush oghlu qirghizistanni gülenchilerning herbiy özgirish qozghash xewpi heqqide agahlandurup bir kün ötkende élan qilindi.

Firansiye agéntliqining xewer qilishiche, jüme küni türk bash elchisi newzat uyanik qazaqistanda échilghan qazaq - türk mekteplirining fetqulla gülenning idé'ologiyisige sadiq wexpiler teripidin bashqurulidighanliqigha ishinidighanliqini, enqerening ularning idiyesini qollimaydighanliqini éytqan.

U, qazaqistan paytexti astanada chaqirilghan muxbirlarni kütüwélish yighinida soz qilip: "Bu mekteplerning türkiyening resmiy dölet organliri bilen héchqandaq alaqisi yoq" dégen we 15 - iyul türkiyede yüz bergen herbiy özgirishke urunush herikitining bashqa döletlerge bérilgen bir agahlandurush signali ikenlikini bildürgen.

U yene munasiwetlik organlarning buninggha qarishi zörür tedbirlerni alidighanliqigha ishinidighanliqini éytqan.

Peyshenbe küni mewlut chawush oghlu CNN türk téléwiziyesige"Eger qirghizistanda herbiy özgirish bolsa, uni fethullah térrorluq teshkilati élip baridighan" liqini bildürgen. Emma bu, qirghiz tashqi ishlar ministirining ret qilishigha uchrighan idi.

Türkiye da'iriliri nöwette amérikida turuwatqan diniy ölima fetqulla gülenni 15 - iyul meghlubiyet bilen axirlashqan herbiy özgirishke chatqan we amérika da'iriliridin uni ötküzüp bérishni telep qilghan. Amérika türkiyedin delil - ispat telep qilip ularning teleplirini ret qilghan idi.

Bu qétimqi herbiy özgirishke urunush herikitide az dégende 270 adem hayatidin ayrilghan. Türkiye hökümiti shundin kéyin 3 ayliq jiddiy halet élan qilip, nechche onming saqchi we herbiylerni tutqun qilghanning üstige, oqutquchi, hökümet xadimliri bolup 60 ming ademni xizmitidin toxtatqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet