Türkiyening xitayda turushluq bash elchisi xitay bilen birlikte térrorluqqa qarshi turidighanliqini bildürgen

Türkiyening xitayda turushluq bash elchisi isma'il hakki musa ürümchide ma shingruy bilen körüshkende, xitay bilen birlikte térrorluqqa qarshi turush, din we bashqa sahelerde hemkarliqni kücheytishni xalaydighanliqni bildürgen.

Xitayning “Tengritagh tori” 30-yanwar küni chiqarghan xewerge qarighanda, türkiyening béyjingdiki bash elchisi isma'il heqqi musa bashchiliqidiki wekiller ömiki 30-yanwar küni ma shingruy bilen körüshüp, türkiye-xitay dostluqi we hemkarliqni chongqurlashturush, ikki terepning soda miqdarini ashurush, xewpsizlik hemkarliqini kücheytish heqqide ortaq tonush hasil qilghan.

Mezkur xewerde déyilishiche, ma shingruy türkiye terep bilen sodini ashurush, “Üch xil küch” ke birlikte qarshi turush ümidini bildürgen. Türkiye bash elchisi isma'il hakki musa bolsa, “Bir belwagh bir yol” qurulushini qollaydighanliqini, xitay bilen xewpsizlik hemkarliqini kücheytip, térrorluqqa jiddiy pozitsiye bilen ortaq zerbe bérishni, diniy we bashqa sahelerdiki alaqini kücheytishni xalaydighanliqini bildürgen.

Xitayning yillardin béri Uyghurlarni “Térrorchi” dep qarilap basturushigha türkiye hökümitining qarshiliq bildürmigenliki melum. Gérmaniyediki “Mérkator xitay tetqiqat merkizi” élan qilghan doklatqa asaslan'ghanda, türkiye dölet iqtisadining nacharliship, türk lirasining qimmitining tarixta eng töwen sewiyesige chüshüp qélishi, türkiyening yawropa ittipaqi we amérika bilen bolghan munasiwitining yirikliship méngishi ularni tebi'iy yosunda xitaygha yéqinlishishqa ündigen.

Türkiye hökümiti xitay bilen bolghan söhbette “Iqtisadiy mesililerni sözlishish, siyasiy amillarni söhbetke arilashturmasliq” ni tekitleydiken. Xitay terepmu türkiyening nöwettiki “Bir belwagh bir yol” qurulushini emelge ashurushtiki muhim istratégiyelik rolini tonup yetkechke, türkiye bilen bolghan alaqisini kücheytishke ehmiyet béridiken.