Xitay da'iriliri türkiye axbarat sahesidikilerni teklip qilip, qeshqerni sayahet qildurdi

Xitay da'iriliri bu yil kirgendin buyan köpligen musulman ellirining muxbirlirini Uyghur élige teklip qilip, “Shinjang hékayisini sözlesh” teshwiqatini qanat yaydurghan bolup, bu qétim türkiye axbarat sahesidin 11 kishini teklip qilip qeshqerni sayahet qildurghan.

Xitayning “Tengritagh tori”, “Shinjang géziti” tori 14-awghust küni chiqarghan süretlik xewerge qarighanda, türkiye taratqulirida belgilik orni we tesiri bolghan 11 kishi xitayning teklipi we orunlashturushi bilen qeshqerge kélip, “Qeshqer qedimiy sheherchisi” ni, “Iparxan menzire rayoni” ni we “Qeshqerning qaynap turghan bazarliri” ni, u yerdiki hüner-sen'et buyumliri dukanlirini ékskursiye qilghan.

Xewerdiki süretlerde, ziyaretchilerning yene “Qeshqer shehiri kona rayonini qoghdash we tüzesh xatire sariyi” ni közdin kechürgenliki körsitilgen. Bu xatire sariyining xitayning qeshqer shehirini chéqip tüzliwetkendin kéyin, kona öylerni teqlid qilip muzéy sheklide yasap chiqqanliqi körünüp turmaqta. Ziyaretchiler “Qeshqer shehirining kona qiyapitining yéngilan'ghanliqi we en'eniwi bimarliq, hüner-sen'et alahidiliklirining saqlinip qalghanliqi” ni teriplesh bilen birge, xelqning naxsha éytip ussul oynap, xushal-xuram yashawatqanliqini medhiyeleshken.

Halbuki süretlerdin biride, qeshqer ketmen baziridiki tömürchi ustining chirayidin xushalliq emes, qayghu-elem ipadilinip turghan bolup, muxbirlargha bek ochuq chiray achmighanliqi melum bolup turidu.

Xitay hökümiti yillardin béri Uyghur muhajirliri köprek toplashqan türkiyege tesir körsitish, hökümetni we hökümet terepdari bolghan taratqularni kontrol qilishqa urunup kelgen bolup, bu yil 7-aydimu türkiyediki muxbirlardin terkib tapqan bir hey'etni teklip qilip, ürümchi, turpan we qeshqerdiki bezi jaylarni ékskursiye qildurghanidi. Bu qétim teklip qilghan 11 kishimu xitay üchün teshwiqat wasitisi bolushqa tallan'ghan köngüldikidek namzatlar dep qaralmaqta.

Türkiyediki zatlardin hamutxan köktürk ependi bu heqte radiyomizgha qilghan sözide, xitay hökümitining Uyghurlargha élip bériwatqan irqiy qirghinchiliqini yoshurush üchün türkiyede her xil yollar bilen teshwiqat élip bériwatqanliqini, bu xil yollar bilen türk xelqini ishendürelmeydighanliqini bildürgenidi.