Enqerede ötküzülgen türkiye-xitay ayallar waliybol musabiqiside sehnige sherqiy türkistan bayriqi ésilghan

3-Iyun küni türkiye paytexti enqerede ötküzülgen türkiye-xitay dölet komandilirining ayallar waliybol musabiqiside, türkiyediki Uyghurlargha hésdashliq qilidighan öktichi partiyelerdin bolghan “Iyi” partiyesining yashlar teshkilati ezaliri musabiqe meydanigha sherqiy türkistanning ay-yultuzliq kök bayriqini ésip, özlirining Uyghurlargha bolghan qollishini ipadiligen. Bu musabiqini “Iyi” partiyesining re'isi meral aqshenermu neq meydandin körgen bolup, sherqiy türkistanning bayriqi del aqshener olturturghan sehnige ésilghan.

Türkiye taratqulirining éytishiche, “Iyi” partiyesidin bolghan yashlar sherqiy türkistan bayriqini ésish bilen bir waqitta, “Sherqiy türkistanliqlar türktur hem menggü türk péti qalidu” digen shu'arlarni towlighan. Musabiqe jeryanida meydanni bashqurghuchilar we saqchilar sherqiy türkistan bayraqni éliwétishke urun'ghan bolsimu, lékin “Iyi” partiyesining yashliri buninggha qarshi chiqqan. “‍Iyi” partiyesining yashlar siyasiti maslashturghuchisi orxan ertürkmen tiwittérda élan qilghan uchurida, “Türkiye-xitay waliybol musabiqiside (bayraqni) chüshüriwétishni telep qildi, lékin u musabiqe boyiche turidu” dep körsetken.

Türkiyediki “Kronos”, “Bir kün” qatarliq taratqularning xewer qilishiche, musabiqe meydanining bashqurghuchiliri we saqchilar bayraq éslghan sehnige kélip bayraqni éliwétishni telep qilghan. Halbuki, saqchilarning bayraqni sehnidin éliwétishqa urunushi “Iyi” partiyesi mes'ullirining tosushigha uchrighan. Xewerde, “Iyi” partiyesi tamashibinlirining bayraqni éliwétishni ret qilipla qalmay, belki yene Uyghurlarni qollash herkitini téximu jushqunluq bilen dawamlashturghanliqi bildürülgen.

“Jumhuriyet” gézitining xewer qilishiche, sherqiy türkistan bayriqi éslghan bu musabiqidiki tamashibinlar ichide türkiye tashqiy ishlar ministiri mewlut chawush'oghlumu bar iken. Xitay terepning bu weqege qandaq inkas qayturghanliqi melum emes, emma ijtima'iy taratqulardiki bezi xewerlerde éytilishiche, bu musabiqidin kéyin, türkiye yashlar we tenterbiye ministirliqi enqere sheherlik hökümetning mezkur sherep méhmanliri sehnisini ishlitish hoquqini bikar qilghan.