Türkiye köchmenler idarisi ötken hepte tutqun qilin'ghan Uyghurning xitaygha qayturulmaqchi bolghanliqini ret qilghan

Türkiye köchmenler idarisi 24-öktebir bayanat élan qilip, 17-öktebir küni türkiye saqchiliri teripidin istanbulda tutqun qilin'ghan bir Uyghurning xitaygha ötküzüp bérilmekchi bolghanliqini ret qilghan.

Bayanatta qeyt qilinishiche, “Bezi taratqularda we ijtima'iy alaqe supilirida tarqalghan Uyghur türkliridin bolghan bir shexsning xitaygha qayturulidighanliqi heqqidiki xewerler emeliyetke uyghun emes” iken. Bayanatta, alaqidar qanunlar boyiche “Héchqandaq bir kishining ten jazasigha uchraydighan, irqiy, diniy mensubiyiti, melum bir ijtima'iy topqa mensup bolushi yaki siyasiy qarashliri sewebidin hayati we erkinliki tehditke uchraydighan bir jaygha ewetilmeydighanliqi” tekitlen'gen.

Bayanatta, bu shexsning ismi tilgha élinmighan bolsimu, emma bir Uyghurning 17-öktebir küni istanbul teptish mehkimisi teripidin élip bérilghan tekshürüsh boyiche türkiye bixeterlik da'iriliri teripidin tutqun qilin'ghanliqi étirap qilin'ghan, shundaqla bu shexsning 20-öktebir küni köchmenler idarisining istanbuldiki bir chet elliklerni qayturush merkizige tapshurulghanliqi bildürülgen.

Bayanatta yene, “Hazirgha qeder héchqandaq bir Uyghurning xitaygha qayturulup barmighanliqi” tekitlen'gen. Buning aldida, istanbulning safaköy rayonida olturushluq mehmud anayet isimlik Uyghur musapirining a'ile-tawabi'ati, ijtima'iy taratqu supilirida üch perzenti bolghan mehmud anayetning türkiye saqchiliri teripidin tutqun qilinip, xitaygha qayturulmaqchi boluwatqanliqini bildürgenidi. Lékin türkiyediki “Qarar” gézitining 25-öktebir bergen xewiride, teptish mehkimisining mehmud anayetni qolgha élish qarari bolmisimu, emma uning chégradin qoghlap chiqirish qarari boyiche 6 ay qamaqta tutup turulushi mumkinlikini bildürmekte. “Qarar” gézitining xewiride, köchmenler idarisi “Hazirgha qeder héchqandaq bir Uyghurning xitaygha qayturulmighanliqi” ni qeyt qilsimu, emma 2018-yildin béri quwanxan, zinnetgül tursun, aynisa tursun, burhan kérim, muhemmet eli, adiljan toxti qatarliq Uyghurlarning xitaygha qayturulghanliqi, ulardin bezilirining tajikistan arqiliq yollan'ghanliqi bildürülgen.