Amérika türkiyening Uyghur rayonidiki lagérlarni taqash chaqiriqini qollidi

Muxbirimiz erkin
2019-02-15
Élxet
Pikir
Share
Print

Amérikining türkiyede turushluq bash elchixanisi 15‏-féwral küni türkiyening Uyghur rayonidiki lagérlarni taqash heqqidiki chaqiriqigha inkas bildürüp, türkiye hökümitining mezkur mesilidiki meydanini qollaydighanliqini bildürgen.

Amérika elchixanisining twétirda élan qilghan bu heqtiki inkasida: "Amérika türkiye tashqi ishla ministirliqining (bu mesilidiki) pikirini qollaydu" déyilgen.

Türkiye tashqi ishlar ministirliqi bayanatchisi hami aqchay ötken shenbe küni bayanat élan qilip, xitayning Uyghur türklirige qaratqan assimilyatsiye siyasitini "Insaniyet üchün intayin éghir nomus" dégen.

Bayanatta yene xitay hökümiti Uyghurlarning tüp kishilik heq-hoquqlirigha emel qilishqa, jaza lagérlirini taqashqa chaqirilghan. Arqidinla yene hakimiyet béshidiki adalet we tereqqiyat partiyesi bayanat élan qilip, türkiye xitayning zémin pütünlüki we bixeterlikige hörmet qilidighanliqi, lékin uning "Bir milyondek Uyghur türkini jaza lagérlirida we türmilerde tutup turushi qanunsizliq" ikenlikini bildürgen.

Xitay hökümiti türkiyening bayanatigha shiddetlik inkas qayturup, uning bu mesilide pikir bildürüshke "Salahiyiti yoqluqi" ni tekitligen idi.

Amérika elchixanisining inkasida türkiye tashqi ishlar ministirliqining bayanati neqil keltürülüp: "Hazir xalighanche tutqun qilin'ghan bir milyondin artuq Uyghur türkining lagér we türmilerde ten jazasi hem siyasiy ménge yuyushqa tutuluwatqanliqi sir emes" déyilgen.

Türkiyening bayanati xitayning naraziliqini qozghighan bolsimu, xelq'ara kishilik hoquq teshkilatlirining alqishigha érishken idi. Kishilik hoquq közitish teshkilati 14‏-féwral élan qilghan bir analizida, türkiye b d t ning komitét teshkillep, delil toplishida yétekchilik rol oynishi kéreklikini bildürgen.

Mezkur teshkilatning mu'awin diréktorliridin biri filip bolopi'on qelemge alghan analizde, "Enqerening bayanat bilen cheklinip qalmay, barliq diplomatik wasitilirini ishqa sélishi, uning 1‏-qedemde jenwediki b d t kishilik hoquq kéngishide birliksep uyushturup, shinjangda delil toplash komitéti quralaydighanliqi" ni bildürgen.

Toluq bet