Uyghur aptonom rayonluq da'iriler türme saqchilirini dawamliq köpeytmektiken

Bu yilning ikkinchi yérimida da'irilerning Uyghur diyaridiki türmilerni kéngeytip quruwatqanliqi heqqide xewer tarqalghan idi. Yéqinda xitay hökümet taratquliri mexsus uchur bérip, rayonda türme saqchilirining köpeytilishke bashlighanliqini ilgiri sürgen.

Xelq torining bügünki xewirige qarighanda, 2016-yili Uyghur aptonom rayonida yéngidin qobul qilin'ghan 64 neper türme saqchisi 17-dékabirdin étibaren ürümchidiki qoralliq saqchi qisim meshiq bazisida üch ayliq resmiy meshiqni bashlighan.

Xewerde déyilishiche, yéngidin qobul qilin'ghan türme saqchiliri türme bashqurush xizmiti boyiche mexsus terbiyelinidiken. Ularning hemmisining “Qosh tilliq” bolushi birdek shert qilin'ghan iken.

“Jenubiy junggo etigenlik pochtisi” gézitining aldinqi künidiki xewiride chén chüen'go Uyghur aptonom rayonigha partkom sékrétari bolup kelgendin buyan rayonda saqchilar bilen bixeterlik tekshürüsh orunlirini jiddiy rewishte köpeytiwatqanliqi tilgha élin'ghan idi. Radiyomizning xoten wilayitidiki saqchixanilardin igilishiche, yéqinqi üch ay mabeynide yéza-kentlerde yardemchi saqchilar hessilep köpeytilgen.

Közetküchiler, da'irilerning Uyghur diyarida türme saqchilirini köpeytishke bashlighanliqi bu yil yazdin buyan rayonda kéngeytip quruluwatqan türmilerning adem küchige bolghan zor éhtiyajini ashkarilap körsetmekte, dep hésablimaqta.